Ussassaarut
Wangenheimip cubamiunik nakorsassarsiortarnissamik suliniut aallarteqqeqqugaa
Nakorsassaaleqisarnermik peqqissaasussaaleqisarnermillu ajornartorsiuteqarneq ukiorpassuarni ilisimaneqarsimavoq, taamaammat Naalakkersuisut peqqinnissaqarfimmi sulisussanik Nunanit Avannarlernit pinnani nunanilli allaneersunik sulisussarsiortariaqarput, Demokraatineersoq Anna Wngenheim oqarpoq.
Norgemi misissuisoqarsimanerata takutippaa, inuit aalajangersimasumik nakorsaqartartut toqujaannginnerusarlutillu napparsimmavimmut unitsinneqannginnerusartut.
Nuummi nakorsap Lone Hovep tassunga atatillugu oqaatigaa, Kalaallit Nunaanni nakorsat paarlakaajaannerujussuisa napparsimasorpassuillu nakorsanit assigiinngitsunit isumagineqartarnerisa malitsigisaannik killuup tungaanut ingerlasoqartoq.
Peqqissutsimulli naalakkersuisuusimasoq Anna Wangenheim (D) naapertorlugu, nakorsanik peqqissaasunillu sulisussarsiortarnermi sulisoqaannarniartarnermilu ajornartorsiut ilisimaneqareerpoq, taassuma piumasaraa Naalakkersuisut cubamiunik sulisussarsiortarnissamik suliniut aallarteqqissagaat.
Ussassaarut
Suliniut Avannaani misileraatitut ingerlanneqartussaasimavoq, tamannalu Naalakkersuisuusimasunit akuerineqarsimalluni, Wangenheimili naapertorlugu suliniut qinersisoqarnerata kingorna unitsikkallarneqarsimavoq.
- Nunat Avannarliit unammillersinnaanngilavut
- Innuttaasut ataavarnerusumik toqqissisimanarnerusumillu atugaqartinneqarnissaasa qanoq qulakkeerneqarsinnaanerat pillugu Avannaata Kommuniani innuttaasut oqaloqatigineqarnissaat uannut pingaaruteqarsimavoq. Innuttaasummi nakorsat paarlakaajaannerujussuat qattussimammassuk tamanna pisariaqartinneqarluinnarpoq.
- Siusinnerusukkut oqaatiginikuuara, nunarsuup sinneranut qiviartariaqartugut, Nunanimi Avannarlerni unammillertoqarnera pissutigalugu nunani avannarlerni sulisussarsiorsinnaanngilagut, nunammi taakku aamma peqqinnissaqarfinni sulisussanik amigaateqaqimmata, Anna Wangenheim oqarpoq.
Taassuma oqaatigaa, Avannaata Kommuni innuttaasut peqqinnissaqarfimmi sulisut paarlakaajaannerujussuat naammaginngilluinnaraat, taamaammallu nunanit allaneersunit peqqinnissaqarfimmi sulisussarsiornissaq piffissanngortoq.
Iluaqutaasinnaasut
Aamma nakorsat cubameersut allatut kultureqaraluarlutillu allatut oqaaseqaraluarpataluunniit.
- Ukiup ataatsip ingerlanerani Danmarkimit taartaasartut tallimat atorneqarnerannut sanilliullugu nakorsat cubameersut ukiumi ataatsimi atuussinnaappata iluaqutaassaqaaq, Anna Wangenheim oqarpoq.
Sermitsiaq.AG-mit Peqqissutsimut Naalakkersuisoq Kirsten Fencker (N) tassunga atatillugu oqaaseqartinniarneqarpoq. Naalakkersuisup upernaaq Aanna Wangenheimimut akissuteqarluni ilisimatitsissutigaa, Naalakkersuisut nunanut inuiaassutsinulluunniit aalajangersimasunut tunngatinneqanngittumik sulisussarsiortarneq sulisunillu tigumminniinnartarneq pillugu misissueqqissaarniartut. Misissueqqissaarnermi Island isiginiarneqartussaasimavoq.
Anna Wangenheimilli tamanna akueriuminaatsippaa:
- Misissueqqissaartoqarusuppoq Islandilu isiginiarneqarniarluni. Tamaanna kinguariarneruvoq. Assersuutigalugumi Ittoqqortoormiini, Saqqami Paamiunilu peqqinnissaqarfinni matusigallartoqartarnera takusimavarput, Anna Wangenheim maanna iliuuseqartoqartariaqarneranik isumaqartoq oqarpoq.