WWF: Issittumi sermeq nunarsuatsinni ajornartorsiutinngussaaq
2100-nngortinnagu immani imaq en meterimik qaffassaaq, WWF mianersoqqusivoq. Nunarsuatsinni innuttaasut sisamararterutaannut tamatuma kinguneranik eqqorneqassapput. .
Issittumi silaannaap kissatsikkiartornerata kinguneranik qarsutsinernit aamma allatigut kinguneqartitsinernit nunarsuatsinni innuttaasut sisamaagaangata ataaseq eqqortassagaat Verdensnaturfondenip, WWF-ip, nalunaarummi nutaami paasisatut allaaseraa.
Taamatut allaaserisaqarpoq Ritzau.
Issittup imartaata sikuata aakkiartornera aamma Kalaallit Nunaanni Issittullu kitaani iluliarsuit aakkiartortut ataatsimut pilerpata tamatuma kingunerissajunnarsivaa nunarsuatsinni immat ukioq 2100-nngortinnagu 1,2 meterimik qaffannissaat. Taamatut oqarput ilisimatusartut nalunaarusiornermik suleqataasut. Naatsorsuinerit tamakku siullermik ilimagisamit immat annertunerusumik qaffannissaannik takutitsipput.
- Sinerissani qarsutsinerit tamatumunnga attuumassuteqartut nunarsuatsinni innuttaasut sisamararterutaannut sunniuteqassapput, WWF-imit taamatut oqaatigineqarpoq.
Ukiuni qulikkaartuni kingullerni Qalasersuarmi silaannaap kissassusaa nunarsuarmi silaannaap kissaassusaata agguaqatigiissillugu qaffannerata marloriaatingajaanik qaffassimavoq, WWF-ip nalunaarusiaani tamanna atuarneqarsinnaavoq.
- Nalunaarusiami takutinneqartoq tassaavoq Issittup kiatsikkiartuinnarnera tassaniinnaanngitsoq annertunerusmilli nunarsuatsinni tamarmi ajornartorsiutaanera, Martin Sommerkorn, WWF-imi issittoq pillugu pilersaarummi silaannaap allanngoriartorneranik siunnersortaasoq taamatut oqarpoq.
- Erseqqissumik oqaatigissagaanni; Issittoq naammattumik issittuutinngikkutsigu tamatuma kinguneri nunarsuatsinni innuttaasut malugissavaat, oqarpoq.
FN'p generalsekretæriata, Ban Ki-moonip, marlunngornermi Svalbardimi ilisimatusarnermik ingerlatsivik tikeraarpaa nunarsuatsinni silaannaap kissatsikkiartornerata kinguneri paasisaqarfigineruniarlugit.
- Amiilaajummerpunga tupaallallungalu Issittumi sermit iigartartut qanoq sukkatigisumik nungukkiartornerat pillugu, Ban oqarpoq.
FN'p generalsekretæriata siornatigut erseqqissaatigereerpaa nunarsuatsinni politikkikkut oqartussat nunarsuatta piujuaannarnissaata qulakkeernissaani "inuttut politikkikkullu akisussaaffeqartut".