2025-mut ilimagisat: Aningaasarsiorneq annikitsumik siuariassaaq, akillu 3 procentimik qaffassapput
Kalaallit Nunaanni Aningaasaqarnermut Siunnersuisooqatigiit ukiup affaanoortumik nalunaarutaata, akit qaffakkiartornerat 2024-mit appasinnerulaarnissaa ilimagineqartoq takutippaa. Peqatigisaanillu nunatta aningaasaqarnerata siuariarnera aamma kigaannerulissaaq.
Siunnersuisooqatigiit siulittaasuata Torben M. Andersenip nunarsuarmi pisut Nuummi Hotel Hans Egedemi saqqummiuppai.
Foto: Oscar Scott Carl
Aningaasaqarnermut siunnersuisooqatigiit 2025-mi ukiup affaanut siullermut nalunaarusiartik, Nuummi isumasioqatigiinnermi saqqummiunneqaqqammisoq piareerpaat. Taanna ilaatigut sammisamik nunatsinni amerlasuunit uukkatarineqartumik, tassalu akinik imaqarpoq.
2025-mi akit qaffakkiartornerat 3 procentit inulaarlugit annertussuseqassasoq ilaatigut atuarneqarsinnaavoq. Akit qaffakkiartornerat tassaavoq ilatigut inuussutissanut, assartuinernut, ineqarnermut akiliutinut, kiassarnermut, innaallagissamullu ilaqutariit atuinerannut ilaasuni akit agguaqatigiissillugu qaffariarnerat.
– Atuisunut akit januar 2024-mit januar 2025-mut 3,6 procentinik qaffapput. Atuisunut akit qaffariaataat uuttugaq 2024-mi immikkut qaffasippoq. Ilaatigut inuussutissanut akit qaffariarnerat ilimagisamit qaffasinneruvoq.
– 2025-mi akit qaffakkiartornerat 2024-mut sanilliullugu appasinnerussasoq ilimagineqarpoq. Nioqqutissat sullissinerillu eqqussukkat akii nunani allanisullingajak qaffassapput, euroqarfimmilu Danmarkimilu akit qaffariarnerat 2 procentit missaanni aalaakkaasunngoqqippoq.
Akit qaffakkiartornerisa ineriartornerat nunatsinni aalajangikkanik pingaarnertut patsiseqarpoq, soorlu benzinap akia qaffasinnerusoq kiisalu pisortat inissiaataanni attartornermi akiliutit qaffasinnerusut.
Aningaasarsiornerup kigaannerusumik siuariarnera sanaartornerup annertunerpaaffissamut killereerneranik raajallu pisarineqartut ikinnerunerannik ataqatigiiffeqarpoq.
Nunatta aningaasaqarnera nunat tamat akornanni pissanganartorsiornermik annikinnerusumik eqqugaavoq. Saqitsaannerullu suli eqqumaffiginissaa pisariaqartoq, siunnersuisooqatigiit allapput.
– Nunat tamat akornanni pissutsit nalorninarneranni aningaasaqarnermut politikip nunatsinni aningaasaqarnermik patajaatsumik qulakkeerinneqataasunngorlugu ilusilersornissaa immikkut pingaaruteqarpoq.
