UPERNAVIK
25-nik ukiulimmik ujaasineq taamaatinneqarpoq
Oqartussaasut angummik 25-nik ukiulimmik maqaasineqartumik ujaasinertik taamaatissallugu aalajangertariaqarsimapput, pineqartoq sapaatip akunnerata naanerani Upernavimmi periarfeerunneqarsimavoq.
Assiliisoq: Leiff Josefsen
Ajoraluartumik 25-nik ukiulimmik Upernavimmi sapaatip akunnerata naanerani maqaasineqartutut nalunaarutigineqartumik nassaarniarneq iluatsinngitsoorpoq.
Kalaallit Nunaanni Politiit nalunaarutigaat, misissuinerit aammalu nassaariniarnissaanut aqqutigineqarsinnaasut tamaasa atorlugit ujaasineq kinguneqanngitsoorsimasoq:
- Upernaviup nunataa qeqertaq, sineriaa kiisalu qanittumi imartat tamaasa misissorneqarput, ilisimannissinnaasut amerlasuut apersorneqarput, aammalu attaveqaatitigut atuisimaneri tamarmik misissorneqarput, politiit tusagassiutinut nalunaarummi allapput nangillutillu:
- Oqartuussaasut innuttaasullu kajumissutsiminnik ujaaseqataasut Upernavimmi aammalu Upernaviup nunataani ujaasiffigineqarsinnaasutut periarfissat tamaasa angut 25-nik ukiulik nassaariniarlugu ujaasiffigigaluarpaat, nassaarineqanngilarli. Ujaasineq ippassaq unitsinneqarpoq, nassaarineqarnissaanut periarfissat tamarmik misilinneqareeraluarlutik nassaarineqanngimmat.
25-nik ukiulik kingullermik takuneqarpoq sapaatip akunnerata naanerani, festivalimut peqataanerata nalaani.
Ilaqutaasut ernumallutik angut inuusuttoq maqaasineqartutut nalunaarutigaat, tamatumalu kingorna Upernavimmi Upernaviullu eqqaani imartamilu annertuumik ujaasineq ingerlanneqarsimavoq.
Ilaqutaasut ilisimatinneqareerput, politiillu innuttaasunut kajumissutsiminnik ujaaseqataasimasorpassuarnut qujassuteqarput.
