28-nik ukiulik meeqqanik takunnittoqarluni toqutsisimasutut ukiuni arfineq-pingasuni pineqaatinneqaatissinneqartoq
Nuummi peqqarniitsumik toqutsisoqarnera Sermersuup Eqqartuussiviani naammassillugu suliarineqarpoq. Toqutsisoq meeqqatik eqqaminniittut aappaminik toqutsisimasutut ukiuni arfineq-pingasuni pineqaatissinneqarpoq.
Sermersuup Eqqartuussiviani pingasunngormat eqqartuussisoqarmat toqutsisoqarsimatillugu tunngaviusumik inatsimmi pineqaatissiissutaasartumit sivisunerusumik pineqaatissiisoqarpoq.
Assi: Morten Okkels
Nuummi toqutsisoqarneranut atatillugu angut 28-nik ukiulik ukiuni arfineq-pingasuni pineqaatissinneqarsimasunut inissiisarfimmiittussanngorlugu eqqartuunneqarpoq. Aappani 2024-mi maajimi toquppaa.
Angutip arnaq qungasiatigut kiinaatigullu savimmik ikilerpaa. Arnaq sivitsunngitsoq aanaarnerminit napparsimmavimmi toquvoq.
Meeqqat marluk kapisinermut takunnittuupput, meeqqallu allat marluk inimi allamiissimallutik. Meeqqat qimaapput politiinullu nalunaarlutik. Arnaq toqusoq meeqqat sisamaasut ilaannut pingasunut anaanaavoq angullu pineqaatissinneqartoq meeqqanut marlunnut ataataavoq.
Toqutsisimasutut ukiuni arfineq-marlunni pineqaatissinneqarsimasunut inissiisarfimmiittussanngortinneqartussaanerannit sakkortunerusumik pineqaatissiisoqartariaqartoq eqqartuussisup unnerluussisussaatitaasoq isumaqatigaa.
Angutip 28-nik ukiullip eqqartuunneqarnini akueralugulu eqqartuunneqarnermi kingorna pineqaatissinneqarsimasut inissiisarfiannukaanneqarpoq.
