29-nik ukiulik Kujataani suli nassaarineqanngilaq

Annertunerusumik ujaasinerup kingorna angut 29-nik ukiulik suli nassaarineqanngilaq.

Arfininngormat ualikkut angut 29-nik ukiulik Narsami anaanaminit maqaasineqartoq nalunaarutigineqarpoq. Angut taanna Qaqortumit Narsamut tallimanngormat unnukkut aallarsimavoq, tikissimananili.

Taama KNR allappoq.

Angutip umiatsiaa nassaarineqarsimasoq, angutilli 29-nik ukiullip sumiinneranik ajoraluartumik suli nutaarsiassaqanngitsoq, ataasinngormat ullaakkut Kalaallit Nunaanni Politiit Sermitsiamut ilisimatitsipput.

Ujaasineq unitsinneqarpoq

Issittumi Sakkutooqarfimmik isumasiuereernerup kingorna sapaammi ualikkut ujaasineq naammassineqartoq, pigaartut pisortaat Preben Kleist ataasinngormat ullaap tungaani nalunaarpoq.

29-nik ukiulik ajunaarsimassangatinneqarpoq, ilaqutaalu ilisimatinneqarput, Preben Kleist oqarpoq.

Angutip 29-nik ukiullip ujaarineqarnerani namminneq kajumissutsiminnik ikiuuttut oqartussat sinnerlugit pigaartut naalagaat qujamasuppoq.

- Ikiuutaalluarsimapput, pigaartut pisortaat oqarpoq.

43-nik ukiulik ajunaartoq

KNR naapertorlugu Kujataani arfininngormat aamma allamik alianartumik pisoqarsimavoq, angut 43-nik ukiulik angut allalu umiatsiaaqqamit nakkarlutik ajunaarmat. Angutip umiatsiaaqqamiittup aappaa, 65-inik ukiulik, annaanneqarpoq ullormilu tassani kingusinnerusukkut napparsimmavimmit angerlartinneqarluni.

Powered by Labrador CMS