3G 2026-mi matuneqassaaq - 2G-lu 2028-mi matuneqassalluni
Tusassip mobilikkut attaveqaatit 2G-t aamma 3G-t matuneqarnissaat nalunaarutigaa. Atuisut pisoqaanerusunik mobilillit nutaanerusunik pitaartariaqalernissaannik tamanna kinguneqarpoq.
3G aappaagu atorunnaassaaq, 2G-lu kingorna aamma matuneqassalluni. Atuisut pisoqaanerusunik mobiilillit attaveqaannarusukkunik nutaanerusunik pitaartariaqassapput.
Swns - Masons - Hemedia/SWNS/Ritzau Scanpix
2026-mi apriilip aallaqqaataanit attaveqaat 3G matuneqassaaq, 2028-milu qaammatit siulliit pingasut ingerlanerani attaveqaat 2G aamma atorunnaassalluni. Attaveqaatit pisoqalinerat pissutaalluni ikiorneqarsinnaajunnaarneq pissamaatinillu pissarsisinnaajunnaarneq tamatumunnga pissutaavoq.
- Aappaagumiit 2G- aamma 3G-attaveqaatinut tunngatillugu ikiorsiineq aammalu atortussamaatinik tuniniaaneq unitsinneqassaaq. Tamannalu peqqutaalluni maanna nalunaarutigereerniarparput 3G ulloq 1. april 2026 matuneqassamaarnera, 2G-lu ukiup 2028-ip qaammataasa siulliit ingerlanerani matuneqarumaarnera, suliffeqarfik ilisimatitsivoq.
Suliffeqarfiit piffissaqartikkumallugit siusissukkut nalunaarutigineqartoq
Suliffeqarfiit ilaat 2G-mik suli atuisut, pisortap tullersortaata aammalu teknikkikkut pisortaasup Jonas Hasselriisip eqqaavaa.
- Nalunngilarput suliffeqarfissuit ilaat assersuutigalugu Nukissiorfiit, naatsorsuinermut atortorissaarutaat 2G-mut atassuseqartikkaat. Taamaammallu suliffeqarfiit atortorissaarutimikkut piareersarsinnaanissaat periarfissinniarlugit, attaveqaasersuinerput tassuunatigut sivisunerulaartumik atuutsissamaarparput, oqarpoq.
Atuisunut siunnersuut
Atuisut amerlanerit 4G-mik imaluunniit 5G-mik atuereerput, kisianni atuisut mobiilinik pisoqaanerusunik – amerlanertigut ukiut arfineq-marluk sinnerlugit pisoqaassusillit — piginnittuusut attaveqaatit matuneqarpata oqalussinnaajunnaarsinnaapput, sms-eqarsinnaanatik datamillu atuisinnaajunnaarsinnaapput.
Atuisut mobilimik atortorissaarutinilluunniit nutaanerusuik minnerpaamik 4G-mik — siunissamilu 5G-mik — atuisinnaasunik pisaarnissaat suliffeqarfiup kaammattuutigaa.
Atuisut mobiilimik indstillinngiatigut imaluunniit atuisunut sullissivimmut attaveqarlutik sunnerneqassanerlutik paasiniarsinnaavaat.
Mobiilit nutaanerusut sunnerneqassanngillat
Mobiilit nutaanersutu tamarmik 4G/5G (VoLTE) atorlugu attaveqarsinnaapput sms-ersinnaallutillu, matusinerullu kingorna kalluarneqassanatik.
Suliffeqarfiit 2G-mik suli atuisut attaviit matuneqartinnagit teknologiimut nutaanerusumut piaartumik nooqqullugit kaammattorneqarput.
