40-nik ukioqalerlunilu ilinniartitsisunngortoq politikeritullu qinigaalluni

2025-mi ukiup affaa siulleq Jørgen Rosbachimut puigunaatsuuvoq:

Demokraatit sinnerlugit qinigassanngortikkami marsip aqqarnanni 354-inik qinigaalluni Inatsisartunut ilaasortanngorpoq. Maajip arfineq-pingajuanni 40-nik ukioqalerpoq.

Juunip 27-anni ilinniartitsisutut ilinniakkaminik naammassinnilluni Ilisimatusarfimmit allagartartaarpoq.

Tullianik pisussaq tassaavoq Inatsisartut ukiakkut ataatsimiinnerat septembarip 19-ianni aallartittussaq.

– Inuuninni tamaanga killinninni suna pissutigalugu politikimut iserpit?

– Ataatama nutaarsiassat pingaartittorujussuusaramigit. Meeraalluta Qanorooq aallartikkaangat nipaarsaartussaasaratta, taamaalillunga meeraallungali politikki malinnaaffigisalerpara, Jørgen Rosbach Sermitsiamut oqaluttuarpoq.

– Inuusuttuunera inuit allat assigalugit timersornermik, ilinniagaqarnermik festernermillu ulikkaarpoq, kisianni politikimut malinnaanissamut piffissaqartuaannarpunga. 20-t sinnerlugit ukioqarlungali politikikkut aalajangiinerit aalajangersimasut pillugit isummersorlunga allattarpunga. Nassuerutigisariaqarpara ilaannikkut Facebookikkut ikinngutikka sunnerniartarlugillu peqatigiinnernik isumaliutersuuteqartarlunga, kisianni aamma piviusorsiortuuvunga ajornartoornernullu aaqqiissutissanik ujartuisarlunga. Sooq politikimut akuliussimanersunga aperineqaruma akissutissatut akisussaassuseqarneq oqaatigerusussagaluarpara. 

Inatsisartuni gruppemi siulittaasoq 

Jørgen Rosbach akisussaaffimmik aamma tiguseqataasarpoq. 

Nalunaarasuartaatinut ingerlatseqatigiiffimmi Tusassimi ukiuni qulingiluani atorfeqarpoq. Aamma suleqataasa ingerlatseqatigiiffiup siulersuisuinut ilaasortassatut 2018-imit 2022-mut qinertarpaat. 

Ilisimatusarfimmi ukiuni sisamani 2021-25-mi ilinniartitsisunngorniarnermini ilinniartitsisunngorniarlutik ilinniartunut allanut ilitsersuisuuvoq, ilinniartut tusaaneqarnissaat sulissutigisimavaa, ilaatigut ilinniartitsisunngorniartuni ilinniartut siunnersuisoqatigiivini siulittaasutut, Ilisimatusarfimmi Siunnersuisoqatigiinnut ilaasortatut aamma Ilisimatusarfiup siulersuisuini ilaasortatut. Jørgen Rosbach Ilisimatusarfimmi bachelorinnghortut tamaasa sinnerlugit naammassilluni allagartartaartitsinermi oqalugiarpoq. Demokraatit marsimi qinerneqarluarput, taakkulu sinnerlugit Inatsisartuni ilaasortanngortut quliusut gruppimi siulittaasussamittut toqqarpaat. Gruppi politikikkut perorsaanermillu piginnaasaqarluartunik ilaasortaqarpoq: Naalakkersuisut siulittaasuat Jens-Frederik Nielsen, Inatsisartuni ilaasortat utoqqaanersaat 75-inik ukiulik Per Berthelsen, misilittagartooq Justus Hansen, qinigaaqqammersut Margrethe T. Andersen aamma Pipaluk Olsen kiisalu sinniisutut ilaasortanngortut Hans-Erik Enoksen, Bo Martinsen aamma Karen-Marie Kyed Frederiksen.

Allannguisoq

Jørgen Rosbach marsip 11-anni Inatsisartunut qinersinermi Demokraatit sinnerlugit qinigassanngortikkami 354-init qinerneqarpoq — qinigaaqqammersuni amerlanerpaanik qinigaasut tulliattut, Naleqqameersumit Aki-Matilda Høegh-Damimit taamaallaat qaangerneqarluni. 

– Aap, qinersisukka 354-it amerlaqaat. Maniguullungalu tupaallappunga, soorunalimi aamma siullerpaamik qinigassanngortinninni taama qinigaalluartiginera tulluusimaarutigaara, Jørgen Rosbach oqarpoq.

– Sooruna Demokraatit sinnerlugit qinigassanngortittutit?

– Ilumoorlunga oqassaguma attaviitsuujuaannarsimavunga. Politikki politikerillu isornartorsioraangakkit tunngavilersuilluarlunga isornartorsiuisarpunga, piffissallu ingerlanerani Demokraatit eqqarsartaasiat soqutigilerpara, pingaartumik ilinniartitaanermut tunngasut pillugit. Angajoqqaakka ilinniagaqarsimanngillat, taamaattumik arlaatigut allannguisuuvunga, marlunnimmi ilinniagaqarpunga, IT-lerisutut aamma ilinniartitsisutut. 

– Namminiilivinnissap tungaanut ingerlaarpugut; namminersorneq qinersisartut 75 procentiisa taperserpaat. Nunarput ullut ilaanni namminiilivissappat atorfippassuarnut nunaqqativut ilinniagaqarsimasut atorfissaqartissavavut. Tamakkunani tamani pineqarlutik IT-lerisunit teknologimillu suliaqartunit aningaasaqarnermut inatsisilerinermillu suliaqartunut tunngapput. Inuiaqatigiit pitsaanerusumik inissisimalernissaat anguniarlugu oqimaaqatigiissaarisoqartariaqarpoq, uannullu pingaarnerpaavoq innuttaasoq sulerusussuseqarluinnartoq – qanoq ilinniagaqarsimanini apeqqutaatinnagu suliumasoq, Jørgen Rosbach oqarpoq. 

Apeqquteqartoq

Inatsisartunut nutaamik qinigaaqqammersut 31-usut apriilip arfineq-aappaanni inissitsiterluni ataatsimiinnerup septembarillu 19-ianni ukiakkut ataatsimiilernissap tungaanut suli ataatsimeeqqinngillat.

- Ataatsimiilernissap tungaanut politikimut tunngasunik sunik suliaqarpit?

- Qinersinerup kingorna ataatsimeeqattaarnerpaanut ilaagunarpunga. Partiip allattaa gruppemilu ilaasortat sapaatip akunneri tamaasa ataatsimeeqatigineqartarput. Inatsisartunilu Demokraatit ilaasortaatitaanni siulittaasutut parti sinnerlugu oqaaseqartartuvut suleqatigisarpakka, partiip politikkia naapertorlugu oqaaseqartoqartarnissaa qulakkeerumallugu, Jørgen Rosbach oqarpoq.

Aamma Aningaasaqarnermut Akileraartarnermullu Ataatsimiititaliami, Aalisarnermut, Piniarnermut Nunalerinermullu Ataatsimiititaliami Sanaartornermullu Ataatsimiititaliami ataatsimiinnernut peqataasarpoq ataatsimiititaliallu angalanerinut peqataasarluni.

– Inuiaqatigiinnut sunniuteqarniarlutit nukitit sumi atorniarpigit?

– Ataatsimiititaliani pingasuni sunniuteqarsinnaanera pingaartumik atorneqassaaq Naalakkersuisunut apeqquteqarnissamut, ataatsimiititaliat aqqutigalugit imaluunniit § 37 naapertorlugu apeqquteqartarnitsigut. Tassanngaanniillu aamma siunnersuuteqarsinnaavugut. Nalunngilarpulli parteerpassuit assigiinngitsunik naleqartitaqarmata anguniagaqarlutillu. Nunatsinni aningaasaqarneq pingaaruteqaqaaq, taamaattumillu politikerit ataasiakkaat kissaataat tamatigut piviusunngorsinnaasanngillat. Tamanna aamma Inatsisartut ataatsimiinneranni siornatigut takusarsimavarput. Mianersortunnguamik isumalluarpunga, partiillu allat attaveqarfigilluarutsigit amerlanerusunik iluaqutissaqalersinnaavugut. 

Jørgen Rosbach apeqquteqartartutut aamma maluginiarneqarsimavoq. § 37 naapertorlugu Naalakkersuisunut apeqquterpassuaqarsimavoq, makkununnga tunngasunik apeqquteqartarluni imminut toquttarneq aamma siorartartarneq, mittarfeqarnernut tunngasut avataanillu tikisillugit suliartortinneqartartut. Apeqquteqaatigineqartut maannamuugallartoq 13-iupput, Naleqqameersoq aperiumatooq Jens NapãtôK’ kisimi amerlanerusunik apeqquteqaateqarsimalluni.

– § 37 naapertorlugu apeqqutit ulapputigigakkit, akissutigineqartullu Inatsisartuni ataatsimiinnerni tunngavilersuutitut atorniarpakka. Inuiaqatigiit sinnerlugit sulivugut, tamatumanilu pisussaaffiit naatsorsuutigineqarnerlu qaffasissumik inissisimallutik. Sapinngisara tamaat iliuuseqassaanga, aamma partiit akimorlugit sulineq ajornakusoortinngilara. Isumatusaarluni eqqarsarneq siumut aqqutissaavoq.