Aaja Chemnitz Sisimiunut tikeraartoq: Aningaasaliisoqarnerunissamut periarfissaqarsoraa
Folketingimut ilaasortaq Aaja Chemnitz (IA) Sisimiunut tikeraaqqammerpoq, tassani Qeqqata Kommuniani borgmesteri Malik Berthelsen peqatigalugu ilaatigut ATV-nut aqqutikkut ingerlavoq. Tikeraarnermini Folketingip najukkami attaveqaasersuutinut inuussutissarsiornermullu siunissami aningaasaliisinnaanera misissorpaa.
Malik Berthelsen (S) aamma Aaja Chemnitz (IA)
Assi: Aaja Chemnitz
Sisimiut eqqaanni pisuttuarfiusinnaasunik, sikkilerfiusinnaasunik, qamuteralaffiusinnaasunik qimusserfiusinnaasunillu ATV-nut aqquteqarpoq.
Folketingimut ilaasortap Aaja Chemnitzip ATV-nut aqqusineq takuniarpaa. Aaja Chemnitz Sisimiut Kangerlussuullu akornanni ATV-nut aqqusernup ujaraaqqanik aqquserngup ineriartortinneqarnissaanik periarfissaqarluartoq tikeraarnerminut atatillugu oqarpoq:
- Folketingimit attaveqaasersuutinut inuussutissarsiornermillu ineriartortitsinermut aningaasaliinissamut periarfissat misissorniarlugit Sisimiuniippunga. ATV-nut aqqutip nutaap manngersarlugu aqqusinniarinissaa periarfissarpassuarnik pissanganartunik pilersitsissaaq, aamma Issittumi tunngaviusumik ilinniarfiup allilerneqarnissaanut illersornissaqarfiup Kangerlussuarmi suliaanut.
Borgmesterimit nersualaarneqartoq
Qeqqata Kommuniani borgmesterip folketingimut ilaasortaq tikeraarnera pillugu nersualaarpaa:
- Siullermik Aaja nunatta attaveqaasersuutitigut ajornartorsiutai pillugit suliniuteqarneranut ineriartortitsinermilu periarfissanik pitsaasunik ukkataqarneranut nersualaarlugulu qujaffigerusuppara, aningaasaqarnikkullu periarfissat nutaat Sisimiut Kangerlussuullu akornanni aqquserniortoqarneratigut Kangerlussuullu ineriartortinneqarneratigut pilersinneqarsinnaasut upperimmagu nuannaarutigaara, Malik Berthelsen Sermitsiamut oqarpoq.
Aningaasaliinissamut periarfissat arlallit eqqartorsimagaat ilisimatitsissutigaa:
- Umiarsualivimmut tunngasut, Kangerlussuup siunissami atorneqarnissaa aamma Sisimiut Kangerlussuullu akornanni aqquserniortoqarsinnaanera.
- Danmarkip nunatsinni attaveqaasersuutitigut aningaasaleeqataasinnaanissaa Statsministerip tusagassiuutitigut oqariartuutaa eqqarsaatigalugu, isumaqarpunga tamanna neriunaateqartoq. Isumaqarpungalu attaveqaasersuutitigut kommunetsinni aningaasaliinissaq maannakkut tullinnguuttariaqartoq.
- Tassami eqqaamassavarput ukiuni kingullerni, siunissamilu kommunit sinneri attaveqaatitigut annertuumik aningaasaliivigineqarnikuupput. Taamaattumik neriuppunga nunatta Naalakkersuisuisa aamma tamanna eqqumaffigalugulu tapersersorumaaraat. Tassami ineriartornermut kommunerput annertuumik tapertaasinnaavoq, soorunamilu aamma uagut ineriartornermut peqataarusuppugut!
Aningaasaliiffigineqanngitsut ukkatarineqartut
Aaja Chemnitz (IA) naapertorlugu nunap immikkoortuini aningaasaliiffiuvallaanngitsuni suliniuteqarnerulernissaq pingaaruteqarpoq:
- Nunap ilaani inuussutissarsiornermut attaveqaasersuutinullu avataanit sivisuumik aningaasaliissuteqarfigineqarsimanngitsuni aningaasaliissuteqartoqarnerusariaqartoq nassuerutigisariaqarparput, oqarpoq.
Folketingip akisussaaffii nunap immikkoortuini ineriartortitserusussuseqarnermut attuumassuteqaraangata ataatsimut aaqqiissutissanik ujartuisarnissaq silatusaarnerusoq naqissusiivoq:
- Folketingip suliassaasa nunaqavissullu ikiuukkumatussusiat imminnut attuumassuteqaraangata periarfissanik misissuineq silatusaarnerusarpoq.
