Folketingimut ilaasortap Aaja Chemnitzip (IA) Danmarkimi ministeri uppisitaanngujoortoq Lars Aagaard sisamanngornermi annaappaa.
Tamanna Folketingimi partiinit illuatungiliuttunit isornartorsiorneqarpoq, tassami Atlantikup avannaaneersut ilaasortat pingasut ministerip taperserneqarnissaa pillugu taasisoqarmat tapersiipput – tamanna Danmarkimi nunap iluani pissutsinut akuliunnertut ilaatigut oqaatigineqarpoq.
Folketingimut ilaasortap Aaja Chemnitzip (IA) Danmarkimi ministeri uppisitaanngujoortoq Lars Aagaard sisamanngornermi annaappaa.
Tamanna Folketingimi partiinit illuatungiliuttunit isornartorsiorneqarpoq, tassami Atlantikup avannaaneersut ilaasortat pingasut ministerip taperserneqarnissaa pillugu taasisoqarmat tapersiipput – tamanna Danmarkimi nunap iluani pissutsinut akuliunnertut ilaatigut oqaatigineqarpoq.
Tamannali Aaja Chemnitzip akerlilerpaa. Kalaallit Nunaata soqutigisai pingaartillugit taama iliorluni Sermitsiamut oqarpoq.
- Qinikkatut naligiippugut
Danskit naalakkersuisuinik tapersersuisutut taamaaliorpoq. Politikkikkut isumaqatigiissuteqarfigai naalakkersuisullu assoralisimaaleraangata tapersiisartussaalluni:
- Danskit naalakkersuisui uannik naatsorsuuteqarsinnaallutik ilisimassagaat pingaaruteqarpoq, tamannalu Kalaallit Nunaata soqutigisaanut tunngatillugu iliorneruvoq, Aaja Chemnitz Sermitsiamut oqarpoq, nangillunilu:
- Qinikkatut naligiippugut. Danmarkimi, Nunatsinni Savalimmiuniluunniit qinerneqaraluarutta, taamaattumik politikkikkut sunniuteqarsinnaanitta atortariaqarnera pingaaruteqarluinnarpoq. Folketingimut qinersinermi ilaasortat 90-issaatut qinigaaffeqarpunga, taamaattumillu naalakkersuisut aallaqqaataaniilli tapersersukkagut oqaloqatigiuarpavut.
Aki-Matilda taaseqataanngitsoq
Arlaannik pisoqartillugu isorinnittumik isiginnittarnini Aaja Chemnitzip naqissuserpaa, tassa danskit naalakkersuisui qanorluunniit ilioraluarpata tapersersortuaannarunnarnagit.
- Danskit naalakkersuisuinik tapersersuisuugaanni suliani ima ittuni tapersiisarnissaq naatsorsuutigineqartassasoq oqaatigissallugu pingaaruteqarpoq - ministerit inatsisaat assigisaalluunniit unioqqutinneqanngippata, Aaja Chemnitz Sermitsiamut oqarpoq.
Kalaallit Nunaat sinnerlugu Folketingimut ilaasortap aappaa Aki-Matilda Høegh-Dam taaseqataanngilaq, taasinermilu danskit naalakkersuisu ataasiinnarmik amerlanerussuteqarput.
Aki-Matilda Høegh-Damip oqaaseqartinnissaa Sermitsiap sulissutigaa.
Taasineq Skaalep qaqutigoortuunnginneraraa
Ilaasortat Atlantikup avannaaneersut ministerip uppisinneqarnissaraluanik pinngitsoortitsinerat Savalimmiut sinnerlugu Folketingimut ilaasortap Sjúrður Skaalep (JF) qaqutigoortuunngitsoq Ritzauimut oqaatigaa.
- Tapersiilluta taasinerput qaqutigut iliuuserineqartartutut immikkuullarissutullu isiginiarneqarpoq. Qinersinermili kingullermi Atlantikup avannaani qinikkat Mette Frederiksenimut tapersersuisuupput.
- Ullumikkut taasinerput aalajangiinerup tamatuma kinguneraa, taamaattumillu ullumikkut pisut immikkuullarissuunngilluinnarput, Sjúrður Skaale (JF) taasinerup kingorna Ritzauimut oqarpoq.
