Aalajangiisartuni nutaani nunatsinni eqqartuussisoq siulittaasunngorpoq
Naligiimmik Pinninnissaq Pillugu Aalajangiisartuni nutaani nunatsinni eqqartuussisoq Kirsten Thomassen siulittaasussatut Naalakkersuisut toqqarpaat.
Kirsten Thomassen Naligiimmik Pinninnissaq Pillugu Aalajangiisartuni siullerpaalluni siulittaasuussaaq.
Assi: Leiff Josefsen
Upernaakkut ataatsimiinnermi naligiissitaaneq assigiinngisitsinnginnissarlu pillugit inatsit Inatsisartut akueraat, tassungalu atatillugu Naligiimmik Pinninnissaq Pillugu Aalajangiisartut pilersinneqarput, tassani innuttaasut tamarmik assigiinngisitsineq pillugu naammagittaalliuuteqarsinnaalissallutik.
Aalajangiisartut toqqarneqareersut Naalakkersuisut tusagassiuutinut nalunaarummi ilisimatitsipput, toqqarneqartullu ukiuni pingasuni atorfeqassapput.
Nunatsinni eqqartuussisoq Kirsten Thomassen siulittaasutut Naalakkersuisut toqqarpaat.
Naligiimmik Pinninnissaq Pillugu Aalajangiisartunut ilaasortat toqqarneqartut allat sisamat tassaapput:
- Qillaq Ilannguaq Olsen, MIO-mit, Sipineq+-mit aamma Inuit Pisinnaatitaaffiinut Siunnersuisooqatigiinnit inassutigineqartoq
- Ditte Enemark Sølbeck, MIO-mit inassutigineqartoq
- Lise Mørup Dalsgaard, Inuit Pisinnaatitaaffiinut Siunnersuisooqatigiinnit inassutigineqartoq
- Poul Erik Munk Pedersen, Ilisimatusarfimmit inassutigineqartoq
Naligiimmik Pinninnissaq Pillugu Aalajangiisartunik pilersitsinikkut inuiaqatigiit naligiinnerusumik inissisimalernissaasa tungaanut alloriarneq annertusoq, Naalakkersuisoq Naaja H. Nathanielsen oqarpoq:
- Kinaluunniit assigiinngisitsivigineqassanngilaq, ajoraluartumilli ilai assigiinngisitsivigineqartarput. Kinaassusersiorluni assigiinngisitsivigineqarluni innuttaasutut misigisimagaanni, maannakkut suliassaq allaffissornikkut naammagittaalliortarfimmut ingerlatinneqarsinnaalerpoq, oqarpoq nangillunilu:
- Tamanna tamaginnut naligiinnerusumik naapertuilluarnerusumillu inissisimalersitseqataassaaq. Taamaattumik nunarput tamakkerlugu iluaqutaasussamik Naligiimmik Pinninnissaq Pillugu Aalajangiisartunik suliatigut nukittuunik piginnaaneqarluartunillu Naalakkersuisut pilersitsisimanerat nalunaarutigisinnaagakku nuannaarutigaara.
