Aalakoornartutorsimallutik biilertut pingasut unitsinneqarput
Tallimanngornerup arfininngornerullu akornanni unnuami Kalaallit Nunaanni Politiit ulapissimapput, pingaartumik Nuummi, tassani inuit pingasut aalakoornartutorsimallutik biilersimasut unitsinneqarmata.
Kalaallit Nunaanni Politiit unnuaq ulapippoq, pingaartumik Nuummi.
Foto: Oscar Scott Carl
Aalakoornartutorsimaguit biilerniaqinak, siunnersuut taanna kikkut tamarmik ilisimavaat, aammami inerteqqutaammat.
Taamaakkaluartoq inuit imminnut allanillu navianartorsiortitsisarput aalakoornartumik sunnerneqarsimallutik biileraangamik, nalunngilaallu aalakoornartumik sunnerneqarsimalluni biilimik ingerlatsinissaq inerteqqutaasoq 0,50 promille sinnerlugu aalakoornartutorsimagaanni.
Tamannalu tallimanngornerup arfininngornerullu akornanni pisimavoq:
- Nuummi politiit nakkutillillutik angalaarnerminni aalakoornartutorsimallutik biilertut pingasut unitsippaat, Jørgen Madsen Kalaallit Nunaanni Politiit pigaartuisa pisortaat oqaluttuarpoq.
Tamatuma saniatigut pigaartut pisortaat ilisimatitsivoq politiit aalakoornartutorsimanermut attuumassuteqartunik allanik ulapputeqarsimasut, soorlu aqqusinermi eqqissiviilliornerit, angerlarsimaffimmi eqqissiviilliornerit allallu aalakoornartutorsimanermut attuumassuteqartut nuna tamakkerlugu politiinut ulapaartitsisimasut.
Inuk toqungasoq nassaarineqarsimasoq pillugu suli nutaarsiassaqanngilaq
Sisamanngornerup ullaassaani Kalaallit Nunaanni Politiit nalunaarfigineqarput inuk toqungasoq Nuummi najugaqarfiit ilaanni nassaarineqarsimasoq.
Misissuinermut tunngatillugu paasissutissanik allanik avammut tusarliussassaqarnersut apeqqutigigatsigu, pisumut tassunga tunngatillugu aamma National enhed for Særlig Kriminalitet-imit teknikerit pinerluttoqarsimaneranik misissuisartut Nuummut politiinut ikiuukkiartorlutik tikissimanerat innersuussutigalugu, pigaartut pisortaat Jørgen Madsen oqarpoq Kalaallit Nunaanni Politiit massakkut suli paasissutissanik allanik saqqummiussisinnaanngitsut.
