Timmisartorluni angalanermi kiffartuussineq assigiinngitsorujussuuvoq — akisuumik business class-imik bilitsisimalluni issiaviit timmisartumi saarlerniittut issiaviginerlugit imaluunniit Monkey Class-imut bilitsimagaanni issiaviit tunorliit issiavigineqarnersut apeqqutaalluni.
Naatsumik oqaatigalugu akilikkat pissarsiarissavat. Amerlanerit tamanna nalunagulu akueraat.
Timmisartorluni angalanermi kiffartuussineq assigiinngitsorujussuuvoq — akisuumik business class-imik bilitsisimalluni issiaviit timmisartumi saarlerniittut issiaviginerlugit imaluunniit Monkey Class-imut bilitsimagaanni issiaviit tunorliit issiavigineqarnersut apeqqutaalluni.
Naatsumik oqaatigalugu akilikkat pissarsiarissavat. Amerlanerit tamanna nalunagulu akueraat.
Aalborgimiit Nuummut aasaanerani timmisartuussineq sapaatip-akunnerani kingullermi aallartimmat aaqqissuussaq nutaarluinnaq saqqummiunneqarpoq, tassanimi ilaasut toqqagaat apeqqutaatinnagu billettip sumi pisiarineqarnera apeqqutaavoq.
Timmisartumik angalanissamut aqqut nutaaq Aarhusimi angalatitsivimmit Ruby Rejserimit pilersinneqarmat siumuinnaq bilitsi 1998 koruuninik akeqartinneqarpoq. Taannali tunngaviusumik akiuvoq - sinneri tamarmik immikkut akilerneqassapput.
Aalborgimiit Nuummut timmisartuussisarnissaq Air Greenlandip nuannaraa, taamaammat Ruby Rejser suleqatigalugu timmisartuussinissamut ilanngupput, Air Greenlandilli nalinginnaasumik timmisartuussisarneratigut akisunerulaartumik, tassa siumuinnaq bilitsimut 3.395 koruuninik akeqartumik.
Tamanna timmisartumi kiffartuussinerup ersarissumik assigiinngissuteqarneranik kinguneqarpoq. Ilaasummi akuleriillutik issiapput – Ruby-miit akikitsumik bilitseqaraluarunik imaluunniit Air Greenlandimiit akisunerusumik bilitseqaraluarunik.
Pisut eqqumiitsut
Timmisartoq sapaatip-akunnerani kingullermi sisamanngornermi angalaqqaarmat tamanna pissutigalugu eqqumiitsunik pisoqarsimavoq, tassani timmisartumi inuttat naatsiianik panertunik sodavandimillu sassaalliuteqannginnerminni ilaasut bilitsi sumi pisiarisimaneraat apeqqutigeqqaartariaqarsimavaat.
Bilitsit Ruby-meersut atorlugit angalagaanni aammalu tamulugassanik sodavandinillu perusukkaanni immikkut akiliisoqartariaqarpoq. Timmisartumi nerisassat inniminnerlugillu angalanissamut ullut arfineq-marluk sioqqullugit akilerneqarsimassapput. 99 koruuneqarput. Nassataqarniaraannittaaq kufferti 15 kilot pallillugit oqimaassusilik 99 koruuneqarpoq.
Aalborgimiit Københavnimut bilitsiutigut akisunerulaarput, nassatalli, nerisassat, imigassat tamulugassallu akinut ilaapput, Inga Dora Gudmundsdottir Markussen Air Greenlandimeersoq nassuiaavoq.
Assi: Jesper Hansen
Air Greenlandimi bilitsisisimasut nalinginnaasumik kiffartuussineq nuannaarutigisinnaavaat — tassalu chipsit, imeq, viinni nerisassallu akeqanngitsut, aammattaaq nassatat 20 kiilumut killilimmik oqimaassusillit akeqanngitsumik nassarneqarsinnaapput.
Taamatut eqqumiitsumik aaqqissuussineq timmisartumut ikiartortussat utaqqinerannik kinguneqarpoq, qarasaasiammi angalasut tamarmik immikkut nassatassanik qanoq amerlatigisunik nassarsinnaanersut paasiuminaatsippaat.
- Angalasut Airsevenimik, Jettimemik namminerluunniit timmisartuutitsinnik angalagaluarpata kiffartuussinissamik assigiimmik neqeroorutigerusuppavut, Inga Dora Gudmundsdottir Markussen, Air Greenlandimi piujuartitsinermut attaveqaqatigiinnermullu pisortaq oqarpoq.
- Air Greenlandip kiffartuussinera naapertorlugu nassatat 20 kiilut, nerisassat, tamulugassat imeruersaatillu bilitsip akianut ilaatinneqartuaannarput, taanna nassuiaavoq.
Suut tamarmik immikkut akeqartut
Timmisartumut ilaanermut atatillugu saniatigut akiligassat allattorsimaffiat Ruby Travelip nittartagaani takuneqarsinnaavoq:
Nassatat 15 kg-mik oqimaassusillit – akia 99,-
Angalaqatigiinnut issiaviit - akia 49,-
Saarlerni issiaviit (uiguleriit 6-12) – akia 99,-
Nerisassat – akiat 99,-
Nissunut inissaqarnerusoq – akia 499,-
Flexibillet (bilitsi angalanissaq akunnernik 48-nik sioqqullugu allanngortinneqarsinnaasoq, inissat apeqqutaatillugit) – akia 1.500,-
Plusbillet (Plusbillet pisiarigaanni issiaviup qeqqani issiavissaq akeqanngilaq) – akia 1.000,-
Timmisartornermi imermik tamulugassanillu pisineq qanoq akeqarnersoq allassimanngilaq, Sermitsiamili sulisoq Aalborgimiit Nuummut timmisartuussinermi siullermi liiterip affaanik imersigami 27 koruuneerpoq.
Codeshare-mik taallugu suleqatigiinneq isumaqarpoq timmisartoq ataaseq timmisartortitseqatigiiffimmit sorlermit timmisartuussisoqarnersoq apeqqutaalluni arlalinnik normulersorneqartartoq. Timmisartut normui ilaatigut mittarfinni nalunaarsuiffinni aamma Flightradar24.com-imi takuneqarsinnaapput. Aalborgimiit Nuummut timmisartoq Airsevenimeersoq CAT677-imik imaluunniit GL750-imik taaguuteqarpoq. Utimut angalanermi CAT778-imik imaluunniit GL751-imik taaguuteqarluni.
