Aalisakkanik avammut niuerneq pillugu kisitsisit naammaannartut

Nunap avammut tunisassiaasa pingaarnerpaartaat siorna piffissamut tassunga sanilliullugu nalikinnerusumik tunineqarput.

Naatsorsueqqissaartarfiup aalisakkat avammut tunisassiat pingaarnerit nalingat pillugit kisitsisaataani nutaani tamanna takuneqarsinnaavoq:

- 2024-mi januaarimiit aggustimut avammut tunisat nalingi katillugit 3.061 mio. koruuniusimapput.

- Ukiup siulianut sanilliullugit 356 mio. koruuninik annikinnerupput, annikilleriarnerlu katillugu 10,4 procentiuvoq. Eqqaamaneqassaarli kisitsisit utaqqiisaagallaq naatsorsuinerummata taamaattumillu kingusinnerusukkut iluarsiiffigineqarsinnaallutik paasissutissat tamakkiinerusut pigineqalerpata.

Aalisakkat ataasiakkaat ima isikkoqarput:

Raajat: Januaarimiit-aggustimut 2024-mi avammut tunisaanerisa nalingat 8,8 procentimik annikilleriarsimavoq, tamanna 157 mio. koruuninik naleqarpoq. Avammut tunisat annertussusaat 4,8 procentimik annikilleriarsimasoq akillu 4,3 procentinik apparlutik.

Qalerallit: Avammut tunineqartut nalingat 7,8 procentimik annikilleriarsimavoq, tunineqartut annertussusaat 11,7 procentimik annikilleriarsimasoq. Taamaalilluni kiilumut akit 4,4 procentinik qaffassimapput.

Saarulliit: Avammut tunineqartut nalingat 19,9 procentimik appariarpoq, tunineqartut annertussusaat 15,6 procentimik annikilleriarsimallutik. Saarulliit avammut tunineqartut kiilumut akia 5,2 procentimik appariarpoq.

Saattuat: Avammut tunineqartut nalingat 18,9 procentimik annikilleriarsimavoq, tunineqartut annertussusaat 15,3 procentinik apparpoq. Kiilumut akia 4,3 procentinik annikilleriarsimalluni.