Aalisakkanik tunisassiorfissuami immikkut ittumik ataatsimeersuartoqalersoq – Naalakkersuisut isumaqatigiinngissuteqartut

Royal Greenlandimi immikkut ittumik ataatsimeersuarnissaq sapaatip-akunnerani matumani tallimanngornermi ingerlanneqassaaq.

Ataatsimeersuarnissamut qaaqqusissut suliffeqarfiit nalunaarsorsimaffianni CVR-imi tamanut saqqummiunneqarpoq, oqaluuserisassallu marluk allaqqallutik:

"Siulersuisunut ilaasortanik siulittaasumillu qinersineq" aamma “allat”.

Suliffeqarfinni Namminersorlutik Oqartussanit pigineqartuni ataatsimeersuarnerit, aalajangiiffigineqareerlutik pisortatigoortumik atuutilersinneqarnissaat siunertaralugu ingerlanneqartarumaartut, upernaaq Naalakkersuisunngortut nalunaarutiginikuuaat. Tassalu maanna immikkut ittumik ataatsimeersuartoqartussanngorpoq.

Aningaasaqarnikkut ajornartorsiortut

Naalakkersuisut allannguutinut, soorlu ingerlatseqatigiiffinni siulersuisuni ilaasortanik taarsersuinermut, piareersarnissamut piffissaqannginnerat ilaatigut pissutaavoq.

Royal Greenland immikkut sammineqarpoq, ingerlatseqatigiiffimmi ukiuni kingullerni aningaasaqarnikkut ajornartorsiorluni amigartooruteqarujussuartarpoq.

Pisortaasimasoq Susanne Arfelt Rajamand ukiuni marlunni atorfeqareerluni februaarimi soraarsinneqarpoq. Siulersuisunut ilaasortaq Preben Sunke pisortaanerugallartutut taamanili atuuppoq.

Maliina Abelsen maajimi 2022-mi siulersuisuni siulittaasunngorpoq. Siulittaasutut ingerlaqqissanersoq tallimanngorpat aalajangerneqassaaq.

Naalakkersuisut isumaqatigiinngitsut

Naalakkersuisut aggustip 15-ianni ataatsimiinnerminni tamanna oqaluuseraat, imaqarniliamilu atuarneqarsinnaavoq isumaqatigiinngissuteqarsimasut.

Naalakkersuisup Naaja H. Nathanielsenip (IA) aalajangiinissamut tunngavilersuutit isumaqatiginngilai.

Naalakkersuisut amerlanerussuteqartut uku aalajangiiffigigaat imaqarniliami takuneqarsinnaavoq:

• isummernissamut tunngavissiami uani isummerfigisassat Naalakkersuisunit akuersissutigineqarnerisa kinguninngua Royal Greenland A/S-imi piaartumik immikkut ittumik ataatsimeersuartoqassasoq,
•  siulersuisuni ilaasortassatut siunnersuutigineqartoq akuerineqassasoq.
• isummernissamut tunngavissiaq una ilanngussamullu oqaasertanik allanngortitsinissamut Naalakkersuisut Siulittaasuat piginnaatinneqassasoq.
  

Naaja H. Nathanielsenip suna pillugu akerliunersoq itisilerneqanngilaq. Sermitsiamit oqaaseqartitsiniarsarivugut.