Aalisakkat avammut tunisat suli naammaannartut
Ukioq manna januaarimiit oktobarimut avammut tunisat nalingi 3.989 mio. koruuniupput. Tamanna siorna piffissamut tassunga sanilliullugu 425 mio. koruuninik appariarneruvoq, Naatsorsueqqissaartarfik ilisimatitsivoq.
Januarimiit oktoberimut 2024 raajat avammut tunineqartut 12,2 procentimik appariarsimapput ukiup siuliani piffissap taamaalineranut sanilliullugu, Kalaallit Nunaanni Naatsorsueqqissaartarfik taamak nalunaaruteqarpoq.
Assiliisoq: Leiff Josefsen
Aalisakkat avammut tunisat siornamut sanilliullugit suli ikinnerupput.
Avammut tunisat nalingi 9,6 procentimik appariarsimasut Naatsorsueqqissaartarfiup kisitsisaatigigallagaasa takutippaat.
Ukiup ataatsip ingerlanerani aalisakkat pingaarnerit avammut tunisat nalingi 3.989 millionit koruuniupput:
- Ukiup siulianut sanilliullugit 425 mio. kr.-nik annikinnerupput, annikilleriarnerlu katillugu 9,6 pct.-iuvoq.
- Eqqaamaneqassaarli kisitsisit utaqqiisaagallaq naatsorsuinerummata taamaattumillu kingusinnerusukkut iluarsiiffigineqarsinnaallutik paasissutissat tamakkiinerusut pigineqalerpata, Naatsorsueqqissaartarfik allappoq.
Aalisakkanut pingaarnernut kisitsisit imaapput:
Raajat januaarimiit-oktobarimut 2024-mi avammut tunisaanerisa nalingat 12,2 pct.-imik annikilleriarsimavoq, tamanna 283 mio. kr.-nik naleqarpoq. Avammut tunisat annertussusaat 7,8 pct.-imik annikilleriarsimasoq akillu 4,8 pct.-inik apparlutik.
Qalerallit avammut tunineqartut nalingat 5,6 pct.-imik annikilleriarsimavoq, tunineqartut annertussusaat 12,7 pct.-imik annikilleriarsimasoq. Taamaalilluni kiilumut akit 8,1 pct.-inik qaffassimapput.
Saarulliit avammut tunineqartut nalingat 10,9 pct.-imik appariarpoq, tunineqartut annertussusaat 6,4 pct.-imik annikilleriarsimallutik. Saarulliit avammut tunineqartut kiilumut akia 4,8 pct.-imik appariarpoq.
Saattuat avammut tunineqartut nalingat 8,6 pct.-imik annikilleriarsimavoq, tunineqartut annertussusaat 9,7 pct.-inik apparpoq. Kiilumut akia 1,2 pct.-inik annertuseriarsimalluni.
Ukiuni kingullerni januaarimiit oktobarimut avammut tunisat takussutissami takuneqarsinnaapput.
Takussutissaq: Naatsorsueqqissaartarfik
