Aalisariut AJSI aalisakkanik
assigiinngitsunik
amerlanerusunik avammut
tuniniaalerusuttoq
Jens Peter Larsen, aalisariummik Ikka ApS-imit
pigineqartumik AJSI-mik ingerlatsisoq, aalisakkanik
assigiinngitsunik avammut tunisisinnaanermut
akuersissutaateqarpoq, aamma saattuanik nunanut allanut
akitsorterussinernut nassiussisalissalluni
Privatfoto
Fiskebåden Ajsi har en tankbeholder om bord, og kan rumme levende fisk ombord
Nuummi mittarfik nutaaq novembarimi
ammarneqarpat, aalisartut toqqaannartumik avammut tunitsivissamik nutaamik
periarfissaqalissapput.
– Mittarfik nutaaq qanittukkut ammarneqassaaq, taamaalillunilu nunanut allanut
niuernissamut periarfissaqalissalluni. Aalisakkanik pisisartut aalisakkanik uumasunik nutaarluinnarnik akitsorterussinerni
pisisarput, Jens Peter Larsen, Ikka ApS-imi
aalisariummik AJSI-mik ingerlatsisumi
pisortaq, oqarpoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat ilaanni allaaserisaavoq.
Allaaserisat pisartagaqartunit siunissami taamaallaat atuarneqarsinnaajumaassapput.
Atuarluarna.
Saattuanik 507,5 kiilunik uumasunik misiligutigalugu nassiussineq siulleq sapaatip
akunnerani kingullermi iluatsilluarpoq,
sulilu amerlanerusunik nassiussisoqarniarluni.
– Nutarterinermi pitsanngorsaanermilu
peqataarusuppugut maannalu aalisakkanik
nutaarluinnarnik akitsorterussinermik
misileraaniarluta. Ukiorpassuarni eqqarsaatigisimavarput aalisakkanik nutaarluinnarnik akitsorterussinerni misileraaniarluta.
Mittarfiit nutaat ammarnissaat sioqqullugu
maannakkut misileraavugut, Jens Peter
Larsen, aalisariummik AJSI-mik Ikka ApSimit pigineqartumik ingerlatsisoq oqarpoq.
Aalisakkat saattuallu akii, aalisartunut
Royal Greenlandip suliffissuinut Polar
Seafoodimulluunniit tunisineranni akigitinneqartartunut sanilliullugit allaanerulluinnarput.
– Akigitinneqartartut allanit allaanerulluinnartut nalunngilarput, aamma saattuanut tunngatillugu. Soorunami aalisakkanit
allanit aamma isertitaqartarpugut, taakkulu aamma angusat ataatsimut isigalugit
eqqarsaatigisariaqarpavut. Misiliineq siulleq
maanna naammassivarput, maannalu tulliani qanoq pisoqassanersoq takussavarput,
Jens Peter Larsen oqarpoq.
Tullii akigissaarnerusussatut
naatsorsuutigineqartut
Saattuat uumasut Hanstholm Fiskeauktionimi marsip 18-ianni tunineqartut siulliit
kiilumut 100 aamma 150 koruunit akornanni akilersillugit tunineqarput. Jens Peter
Larsenip naatsorsuutigaa saattuat uumasut
tullii 500 kiilut, Nuummi umiarsualivimmi
poortorneqareerpata aqaguani akitsorterunneqartussatut naatsorsuutigineqartut,
taamalu sapaatip akunnerata naanerani
quersuarmiitinneqaqqaaratik akitsorterunneqassallutik.
– Saattuat uumasut siulliit pappiararsorneq pissutigalugu kinguaattuulaaramik.
Taakku sisamanngornermi tikiunneqarput
aatsaallu ataasinngornermi akitsorterussisoqarnerani tunineqarlutik. Nutaajutillugit
tunineqarnissaat siunertaagami, oqarpoq,
tamatumunngalu atatillugu Blue Water
aamma Air Greenland saattuanik uumasunik assartuinerannik nersualaarlugit. Saattuammi uumasut 500 kiilut Nuummiit
Hanstholmimut assartorneqarneranni,
taamaallaat saattuat 13-it toqusoorutigineqarmata.
– Air Greenlandip Blue Waterillu nutarterinermut pitsanngorsaanermullu
peqataarusunnerat malunnarpoq, aamma
saattuat aalisakkanik akitsorterussinermut
apuulluarneqarput, pissarsiaalluarput, Jens
Peter Larsen oqarpoq
AJSI aalisakkanut uumasunut
tankeqartoq
Ikka ApS aalisakkanik assigiinngitsunik
avammut tunisisinnaanermut akuersissutaateqarpoq, Hanstholm Fiskeauktionimillu
kissaatigineqartutut saarulliit, suluppaakkat
qalerallillu Kalaallit Nunaanni pisat nutaat
tuniniarnissaannik kissaateqartoqarnera
piviusunngortikkusullugu.
– Aalisakkanik assigiinngitsunik avammut tunisisinnaanermut akuersissutaateqarpugut, soorlu nipisat suaannik, saarullinnik aalisakkanillu allanik, aalisariullu
AJSI tankeqarpoq aalisakkanik uumasunik
immerneqarsinnaasumik. Aalisakkat suliarisinnaavavut, nalunaaquttallu akunneri
marluk pingasulluunniit qaangiutsinnagit
poortorsinnaallugit timmisartukkullu nassiullugit, taamaalilluta aalisakkat pitsaassusaat qulakkeerlugu. Aalisakkallu pitsaasuugaangata akigissaartinneqartarput, Jens
Peter Larsen oqarpoq