Aalisarnermut akitsuutinit isertitat 2025-mi appariartussapput

Nunatta karsiata isertitaanit aalisarnermut isumalluutit erniaannut akitsuusiinerit 2023-mut sanilliullugit 2025-mi appariartussatuatut naatsorsuutigineqarpoq.

2023-mi nunatta karsiata ernianut akitsuusiinernit 553 millionit koruunit pissarsiarai. 2025-mi aningaasat taakku 12 procentimik appariarlutik 489 millionit koruuniussapput, 2025-mut aningaasanut inatsisissatut siunnersuummi missingerneqarpoq.

Pissutsit arlaliusut

Aningaasat isertinneqartut amerlassusaannik Aningaasaqarnermut Naalakkersuisoqarfiup mianersortumik missingiisimaneranut pissutaasut arlaliupput, ukulu tunngavigalugit missingiineq nassuiaasersorpaat:

• 2024-mi pisassiissutissanut qaffasissusissanut ilimagisaq
• Pisassiissutit atornissaannut ilimagisaq
• Aalisakkanik tunisassianut avammut nioqquteqarnermi ineriartortoqarnissaanut ilimagisaq kiisalu aalisakkanik tunisassiat assigiinngitsut avammut nioqqutigineqartut amerlassusissaannik ilimagisaq

- Avammut niuernermi akigititat aamma aalisakkanik tunisassianik nunani Kalaallit Nunaata aalisakkanik tunisassianik niuerfigisaanni piumasaqarneq aningaasaqarnermut aalajangiisuusorujussuussapput. Kalaallit Nunaata aalisakkanik tunisassianut avammut niuernermi akigititai uninngaannartuunngillat, kisiannili nunarsuarmi niuerfinni qanoq neqeroortoqarnera piumasoqarneralu tassani apeqqutaasarluni. Taamaalilluni aalisakkanik tunisassiap aalajangersimasup ukioq manna assigalugu ukiup tulliani taamatut akilerlugu tunineqarsinnaanissaa kiisalu aalisakkat taakkua aalisartarnissaat qularnaarneqarsinnaanngilaq, aningaasanut inatsisissatut siunnersuummi nassuiarneqarpoq.

2023 — Ukioq aatsaat taama amerlatigisunik isertitaqarfiusoq

Aammattaaq 2023-mi aatsaat taamak isertitaqartoqarsimatigisoq innersuussutaavoq, tassami akit ilimagisamit pitsaanerusumik ineriartorfiulersimammata, aappaagulu avammut tunisinermi akit 2023-misut pitsaatigilernissaat qulakkeerneqarsinnaanngilaq.

- 2025-mi aalisakkanut akit 2023-mi akinit piviusunngortinneqarsimasunit 5%-imik minnerunissaat ilimagineqarput. Missingersuutini ilimagineqarpoq pisassiissutinik atuineq aalisakkat suuneri apeqqutaallutik 90/100%-iniikkumaartoq. Kitaani raajanut pisassiissutissat ikiliartortinneqarnissaannik siunnersuisarnerit pissutaalluni raajanut pisassiissutit 2024-mi 2023-mut sanilliullugu 7.500 tonsinik ikileriartinneqarsimapput, 2024-mullu sanilliullugu 2025-mi 7.500 tonsinik suli ikileriaqqittussaammata tamanna malugeqquneqarpoq. Tamanna pissutigalugu 2025-mi isumalluutinut akitsuutinit iluanaarutissat ikinnerunissaat aamma ilimagineqarpoq, nassuiaatigineqarpoq.

Isertitat annersaasa pingajuat

Akitsuut tamanna aningaasanut inatsisissatut siunnersuummi isertitat annersaasa pingajuattut inissisimavoq, nuna tamakkerlugu akileraarutinit akitsuutinillu eqqussuinermut akitsuutinit kisimi qaangerneqarluni, taakkumi 1,381 milliardit koruuninik aamma 650 millionit koruuninik isertitaqartitsinissaat naatsorsuutaavoq.

Akileraarutit akitsuutillu tamarmik – suliffeqarnermut ilanngaat ilanngaatigereerlugu – 3,070 milliardit koruuninik naleqarput, tassa 2023-mut Nunatta Karsianit naatsorsuutigineqartumit 7 procentinik amerlanerullutik.