Aalisarnermut inatsisissap ataatsimiititaliami suliarineqarnera isornartorsiorneqarpoq

Aalisarnermut inatsisissatut siunnersuut akerleriissutaasoq sisamanngorpat pingajussaaneerneqarpat akuerineqarnissaa qanilliallappoq.

Aalisarnermut, Piniarnermut Nunalerinermullu Ataatsimiititaliap ilassutitut isumaliutissiissutini saqqummiuppaa, amerlanerussuteqartullu IA-meersut Siumumeersullu siunnersuut naammagisimaarpaat, akuerineqarnissaanullu innersuussipput.

Ataatsimiititaliamili ilaasortat illuatungiliuttut naammaginninngilluinnarput, tamarmillu immikkut ikinnerussuteqarlutik oqaaseqaamminni sakkortuumik isornartorsiuillutik.

Paasissutissat amigaataasut

Royal Greenlandip pisassiissutai pillugit Naalakkersuisut allannguutissatut siunnersuutaat qitiusoq ataatsimiititaliami amerlanerussuteqartut takunagulu ilassutitut isumaliutissiissummik atsiornerat, inatsisissatullu siunnersuutip akuersissutigineqarnissaanut innersuussuteqarnerat, akerleriissutaavoq.

"Aalisarnermik aningaasalersuinissamut atatillugu apeqqutit aningaasaqarnermut tunngasut suli nalornissutaasut paasinarsiseqqullugit pingajussaaneerinninnissaq sioqqullugu aningaasalersuisarfinnut attuumassuteqartunut" Naalakkersuisut attaveqaqqullugit, ataatsimiititaliamit kaammattuutaavortaaq. 

Amerlanerussuteqartut isumaliutissiissutiminnik saqqummiussinissaat tapersersuinissaallu tikillugu apeqqutinut taakkununnga ataatsimiititaliaq akissuteqanngitsoortoq, tamanna isumaqarpoq. Tamanna ataatsimiititaliami ilaasortanit illuatungiliuttunit isornartorsiorneqarpoq.

Naleraq: Sattaserneruvoq

Inuit Ataqatigiit Siumullu naalakkersuisuutitaqartut ilaatigut aningaasaqarnikkut kingunissat eqqartornagit suliamik Naalakkersuisunut ingerlatitseqqiinerat, Naleqqami ilaasortap tupigusuutigaa:

- Ilami Inatsisartuni suliakkiissutaasimanngitsumik Naalakkersuisut toqqaannartumik suliaqarsinnaanngillat, taamaammat imarisai sunniutigisassaalu eqqartoqqaannguarnagit taamatut sattaaserluni qaaginnaasiortumillu ataatsimiititaliami suliarinnguarnagu Naalakkersuisunut suliakkiisoqarniaannarmat Naleqqamit uggoreqaarput, Naleqqamit ataatsimiititaliami ilaasortaq Jens Napãtôk’ oqarpoq.

Atassutittaaq ataatsimiititaliami ilaasortaatitaata Aqqalu Jerimiassenip sulineq eqqarsarnartoqartippaa. Naalakkersuisut allaannguutissaannut suli siunnersuummik takkuttoqanngitsoq isumaliuutissiissummik atsioqqusisoqarnera aatsaavissuaq takunerarlugu oqaaseqarpoq:

- Inatsisissaq tamatsinnut eqquisussaq, ulluinnatsinnullumi annertuumik sunniuteqartussaq sooq taama tuaviuunneqartiginersoq apeqqusernarpoq, apeqqutinnguilluunniit amerlanerussuteqartunit utaqqissuteqqusaanatik, ikinnerussuteqartut oqaaseqaataanni Aqqalu Jerimiassen allappoq.