Aalisarnermut siunnersuut Polar Seafoodip tupaallaatigaa
Naalakkersuisut nalunaarutissanik arlalinnik namminersortunut aalisartitseqatigiiffinnut taakkulu sulisunuinnaanngitsoq, aammali kommuninut nunattalu karsianut aningaasaqarnikkut annertoorujussuarnik kinguneqarnerluttussanik tusarniaassutinik saqqummiussipput, taama Polar Seafoodip mianersoqqussutai nipeqarput.
Miki Brøns Bent Sallingillu nalunaarutit nutaat piviusunngortinneqassappata, Polar Seafoodip, sulisut, kommunit Nunattalu Karsiata annertoorujussuarnik aningaasatigut annaasaqarnissaat ilimagaat.
Toqqorsivimmit assi: Leiff Josefsen
Ukiortaaginnartoq nalunaarutit nutaat aalisarnermut immikkoortumi annertoorujussuarmik allannguinissamut siunnerfeqarput, Polar Seafoodillu isumaa naapertorlugu taakku nunatsinni aalisarneq ajunaarnersuup tungaanut ingerlatissavaat.
- Nalunaarutit maanna ilusaattut iluseqartillugit akuerineqassappata, aalisartitseqatigiiffiit namminersortut qaleralittassamik pingajorarterutaat annaassavaat, raajaqarfinnullu piukkunnarnerpaanut ukiortaaginnartoq iseqqusaajunnaassapput, Polar Seafoodimi piginneqataasut pisortallu marluk Bent Salling Miki Brønsilu oqarput.
Umiarsuit tunisassiorfiit inerteqqutigineqalersut
Ingammik aalisarnermi teknikikkut malittarisassiuussineq pillugu nalunaarut aalisartitseqatigiiffiit inuinnarnit pigineqartut annersaannut sakkortoorujussuarmik kinguneqassaaq, tassanimi Qeqertarsuup Tunuani raajarniarfiit piukkunnarnersaanni kilisaatit tunisassiortut aalisarnissaat inerteqqutaalissasoq siunniunneqarpoq.
Polar Seafoodip umiarsuaatai pingasut eqqorneqassapput, tamannalu ingerlatseqatigiiffik naapertorlugu ima kinguneqaateqassaaq:
- Aalisakkanut akitsuutinut akileraarutinullu A-nut annaasat 66 million koruunit angullugit.
- Inuttat aningaasarsiaat ilanngaaseriikkat ukiumut 32 million koruuninik appariaateqassapput.
- Imminut akilersinnaassutsimi appariartoorneq ineriartortitsinermik aningaasaliinermillu pinngitsoortitsisussaq.
- Nunatsinni aalisariutit pigineqareersut ilaat amerlasuut piffinni piukkunnarnerpaani aalisarsinnaajunnaassapput, taakkulu allanik taartissaqanngillat. Taamaalilluni Namminersorlutik Oqartussat aalisartitseqatigiiffittulli isertitassanik annaasaqassanerat tikkuarneqarpoq, ilanngullugulu nunatta karsiata raajanit isertitassaat TAC-p appasinnerunerata kingunerisaanik appartussaareernera erseqqissaatigineqarpoq.
Naatsorsukkat amigaatigineqartut
Naalakkersuisut nalunaarutissanut nutaanut atatillugu aningaasaqarnikkut kinguneqaatissanik sooq suliaqarsimannginnerat Bent Sallingip Miki Brønsillu paasisinnaanngilaat, ilanngullugulu isertitatigut appariartoornissap 2025-mut aningaasanut inatsimmut ilanngunneqarsimannginnera tikkuarlugu.
Tusarniaanerup sapaatit akunnerini pingasuinnarni ingerlanneqarnera isornartorsiorneqartoq.
- Taamaalilluni akileraartartut nalinginnaasut ukiuni aggersuni nalunaarutinut akiliisinneqartussanngorput, Miki Brøns Bent Sallingilu erseqqissaapput, taakkulu “taama tunngavissakitsigisumik taamalu sivikitsigisumik periarfissiilluni allannguinernik taamak annertutigisunik suliaqarneq akisussaassuseqanngitsumik akuutitsinngitsigisumillu ingerlanneqarnera” erseqqissarpaat.
Tusarniaanermi siunnersuut tamakkiisoq uani atuaruk:
Aalisarnerup teknikikkut iluarsartuussivigineqarnera pillugu Namminersorlutik Oqartussat nalunaarutissaattut siunnersuutip tusarniutigineqarnera
Qalerallit aamma eqqorneqassapput
Raajarniarnermuinnaq killilersuutit aalisartitseqatigiiffimmik inuinnarnik pigineqartut annersaanni piginnittunut aarlerinartorsiortitsinngilaq.
PNNP pillugu nalunaarutissami Kalaallit Nunaata kitaani qaleralinniarnermik ingerlatsereersut pisassaasa pingajorarterutaannik arsaarneqarnissaat siunniunneqarpoq, ingerlatseqatigiiffillu naapertorlugu tamanna ima kinguneqassaaq:
- Inuttat aningaasarsiaat ilanngaasereerlugit 17-18 procentinik appariassapput.
- Akileraartutigut isertitat 50 million koruunit angullugit appariassapput.
- Ingerlatsisut pisassareriikkaminnik pisarinneqqittariaqartut aningaasatigut nanertorneqassapput.
- Tamanna aalisartitseqatigiiffiit pioreersut taakkulu inuttaasa aningaasaqarnerannut nanertuissaaq. Aammaarluni ullumikkut umiarsuaateqareersunik ingerlatsisussaqannginneq eqqarsaatigineqanngitsoq, Polar Seafoodimi pisortaanerit tikkuaapput.
