Aallaasersortoqartoq: Angut utoqqaq navianartorsiortitsisutut unnerluutigineqarpoq
Angut utoqqaq politiit naliliineri naapertorlugit Itillimi angerlarsimaffimminit aallaasiminik aallartoornermi kingorna unnerluunneqarpoq. Tamatuma saniatigut ullup unnuallu kingulliup ingerlanerani Sarfannguani ammoniakkimik annikitsumik aamma kuuttoortoqarpoq.
Toqqorsivimmiit Assi: Leiff Josefsen
Politiit nunaqarfik Itilleq aallaasersorfigineqarsimasoq pillugu sapaammi ualikkut nalunaaquttap pingasut missaani nalunaarfigineqarput, iliuuseqarlutillu aallartipput.
Angut utoqqaq sapaatiummat ualikkut sivikitsumik tigusarineqarsimasoq killisiorneqarsimasorlu pigaartut pisortaat Carl Sværd pisimasoq pillugu ataasinngornermi ullaakkut oqarpoq:
- Angut utoqqaq angerlarsimaffimmini aallaasiminik aallartoorsimavoq.
- Inuit allat eqqaaniissimammata maanna navianartorsiortitsisutut unnerluutigineqarpoq, Carl Sværd nassuiaavoq.
Sarfannguit eqqaanni kuuttoortoqartoq
Sarfannguani upalungaarsimasuttaaq sapaammi unnukkut politiinit nalunaarfigineqarput. Nunaqarfimmi tunisassiorfimmiit ammoniakimik kuuttoortoqarneranik nalunaartoqarnera pissutigalugu innuttaasut igalaatik matutillu matoqqatissagaat upalungaarsimasut piumaffigaat.
Kalerrisaarut akunnerit marlussuit qaangiummata atorunnaarsinneqarpoq.
Qujanartumik annikitsumik kuuttoqarsimasoq, ammoniakkimilli kuuttoqartillugu oqartussaasut mianersortuaannartut Carl Sværd oqaluttuarpoq:
- Ammoniakkimik kuuttoqarnera peqqissutsimut navianaateqangaarami ilungersunarsisinnaavoq, Carl Sværd nassuiaavoq.
