Aallartitaqarnikkut ilungersunartorsiornerup nalaani nunanit allanit tikeraartoqartoq – Vance marlup qeqqa missaaq
Vicepræsident Vance Kalaallit Nunaannut nal. Ataatsinut missasoq ilimagineqarpoq. Isumannaallisaanermut siunnersorti aamma ilaassagunarpoq. Tikeraarneq Kalallit Nunaata, Danmarkip USA-llu akornanni aallartitaqarnikkut ilungersunartorsiornerup nalaani pivoq.
J.D. Vance, tusagassiutit arlallit naapertorlugit, marlunngornermi Pituffik Space Base-mi oqalugiassaaq. Nulia Usha Vance aamma peqataassaaq.
Assi: Jeff Kowalsky/AFP/Ritzau Scanpix
USA-p vicepræsidentia J. D. Vance nulialu Usha Vance Kalaallit Nunaata kitaata nalunaaqutaa malillugu marluk qeqqata missaanni Pituffimmut missapput.
Taama TV 2 nalunaarpoq.
Taakku USA-mit tallimanngornermi Kalaallit Nunaata kitaata nalunaaqutaa malillugu ullaakkut arfineq pingasunut aallassagunarput. Aappariit tallimanngornermi kingusinnerusukkut angerlassapput.
Tkeraarneq sapaatip akunnerani nunat tamat akornanni Kalaallit Nunaata annertoorujussuarmik sammineqarnerata nalaani, aammali aallartitaqarnikkut annertuumik tatineqarnerata nalaani pissaaq.
Usha Vancep Kalaallit Nunaannut tikeraarnissamik pilersaaruteqarneranik Sermitsiap arfinngormat allaaserinninnerata kingorna, Naalakkersuisuugallartut akissuteqarput, akissummilu tikeraarnerup Kalaallit Nunaata naalakkersuisunik nutaanik pilersitsileruttornerani sakkortuumik iliornertut isigineqartoq oqaatigineqarpoq.
Naalakkersuisunut siulittaasuugallartup Múte B. Egedep (IA), allaat Kalaallit Nunaata USA-llu akornanni piffissami sivisuumi qanimut attaveqarsimaneq, Kalaallillu Nunaata USA-mik tatiginninnera unitsillugu oqaaseqarpoq:
- (..) pissutsit taamatut ingerlasimanerat qaangiuttoq nassuerutigisariaqarparput, amerikamiummi siuttuisa nutaat ataatsimoorfigisimasagut soqutiginngilluinnarpaat, maannalu uagut qulaalluta nunatta tigunissaa kisiat aallutilerpaat, Múte B. Egede oqarpoq, Naalakkersuisullu piffissami kingullermi amerikamiunik oqaloqatiginninniarsimagaluarnerat iluaqutaasimanngitsoq, ilaanngullugu aamma oqaatigaa:
- Aallartitaqarnikkut tamallu oqartussaaqataaneratigut periarfissat tamaasa misilippagut, tamakkulu tamaasa Donald Trumpip naalakkersuisuisalu Kalaallit Nunaannik piginnittuulerusullutillu nakkutilliiniarnermik siunertaqarneranni soqutigineqanngillat.
Usha aamma J. D. Vance tallimangornermi Pituffik Space Basemi amerikamiut sakkuuinut tikeraassapput.
Tussagassiorfiit arlallit isumannaallisaanermut siunnersortip Mike Waltzip nukissiuuteqarnermullu ministerip chris Wrightip aamma angalaqataanissaat allaaseraat. Tamannali pisortatigoortumik uppernarsarneqanngilaq.
Senatori republikaneri Mike Lee aamma angalaqataassasoq CNN allappoq. Taanna Trumpip Kalaallit Nunaannik nakkutilliilerusunneranut pilersaarutinut sakkortuumik illersuisuuvoq.
Vance “Kalaallit Nunaani isumannaallisaanerup qanoq innera takuniarlugu” Kalaallit Nunaannut tikeraarniarluni sapaatip akunnerani uani siusinnerusukkut oqarpoq.
Marlunngormat amerikamiut Nuummut Sisimiunullu tikeraarnissamut pilersaarutitik taamaatiinnarpaat. Tamanna pissutsinik sakkukillisaanerut danskit politikeriisa arlallit taavaat.
Pingasunngornermili præsident Donald Trump apersorneqarnermini marlunni ilaatigut Danmarkip USA Kalaallit Nunaannik tigusitsitsisariaqartoq oqaatigaa, USA-llu Kalaallit Nunaannik tigusiniarnermini pisariaqartut tamaasa angullugit iliorsinnaasunartoq oqaatigalugu.
Trump naapertorlugu Kalaallit Nunaat USA-p naalagaaffittut kiisalu Nunarsuup sinnerata isumannaatsuunissaanut pisariaqartpoq. Oqariartuut tamanna Vancep uteqqippaa.
Tallimanngornermi tikeraarneq nalunaaqutaq aqqanernut naalakkersuisut nutaat ilisaritinneqarnerat peqatigalugu pissaaq. USA-mik ilungersunartorsiorneq politikikkut aquttut nutaat sammisassaanni pingaarnerpaasussatut ilimagineqarpoq.
