Aammaarlugu: N-imit S-imillu nalunaaquttap ingerlaarfia oqallisissanngortinneqartoq

Nalunaaquttap ingerlaarfia utertinneqarlunilu aasaanerani nalunaaqutaq atorunnaarsinneqartariaqarpoq, taamaalilluni innuttaasut marsimi oktobarimilu nalunaaquttamik nikisitseqqittariaarutissallutik.

Inatsisartuni oqaluuserisassatut siunnersuutit marluk ullumi marlunngornermi oktobarip 14-iani siullermeerluni oqaluuserineqassapput. Naleqqap oqaluuserisassanngortitaa nr. 85 aamma Siumumit oqaluuserisassanngortinneqartoq nr. 104 ataatsikkut suliarineqassapput. Nalunaaquttap ingerlaarfianut sivitsortumik oqaluuserineqartumut tunngammata ataatsimoortinneqarput.

Inatsit akuerineqassappat 2026-mi oktobarimi atuutilernissaa partiit siunnersuuteqartut kissaatigaat. Taamaaliornikkut inuussutissarsiortut allannguinermut naleqqussarnissamik piffissaqarluarnissaat nassuiaammi erseqqissaatigineqarpoq.

- Siunnersuutigineqarpoq nalunaaqutaq ullumikkut 14:00-inngorpat, taarsiullugu nalunaaqutaq 13.00-inngussasoq, tassa seqerngup kaavinnera naapertorlugu nalunaaqutaq inissisimalissasoq, Siumumit tunngavilersuutigineqarpoq.

Naleqqamit isumaqataapput:

- Ilumoorsinnaanngilaq uagut Kalaallit Nunaanniittuusugut Danmarkip nalunaaqutaanut naleqqussassasugut, nalunaaquttat nikinganeri akunnernik sisamaniit akunnernut pingasunut apparlugit. Aningaasatigunngooq aammalu allaffimmiut ulluinnarni Danmarkimut attaveqartartunngooq iluaqutaanera sakkuliuullugit. Tamanna pivoq piniartut aalisartullu nunatsinniittut pilliutigalugit, ingammik ukiaanerani avalassinnaaniarlutik qaammarseerujussuaqqaartartut. Taakku ullut tamaasa akunnernik suliffissaraluaminnik annaasaqartarput, Naleqqamiit Inatsisartut-gruppimiittut oqarput.

Allannguutissaq Qupanuk Olsenimit siunnersuutigineqaqqaaraluarpoq, taannali KTI-mi pisortatut atorfininnerminut atatillugu sulinngiffeqalermat siunnersuut Inatsisartuni suliarineqarnissaa Naleqqamit aalajangerneqarpoq.

Aasaanerani nalunaaqutaq atorunnaarsittariaqartoq

2023-mi oktobarimi nalunaaquttap ingerlaarnerata allanngornera arlalinnit isornartorsiorneqangaatsiarpoq. Kalaallit Nunaanni nalunaaquttap ingerlaarfia UTC-2-mut 2023-mi oktobarimi allanngortinneqarpoq, taamaalilluni Kalaallit Nunaata Danmarkillu nalunaaqutaat akunnernik pingasunik nikingalerlutik.

Nalunaaquttap ingerlaarfiata allanngortinneqarnera innuttaasunut arlalinnut ajornartorsiutaavoq, aamma nalunaaquttap seqernullu nikingassutaat peqqissutsimut sunniuteqarsinnaasoq nunani tamalaani misissuinerit takutikkaat, Naleqqamit ilaatigut oqaatigineqarpoq.

Partiit nalunaaquttap ingerlaarfiata UTC-3-mut uterteqqinnerata saniatigut aasaanerani nalunaaquttap atorunnaarsinneqarnissaa aamma siunnersuutigaat:

- Siusinnerusukkut Inatsisartuni aasaanerani nalunaaquttap atorunnaarsinnissaanik suliniuteqarnissaq kissaatigineqarsimavoq, soorlu 2024-mi immikkoortoq 86 aqqutigalugu Siumut qaqitsimmat aamma 2019-imi upernaakkut ataatsimiinnermi immikkoortoq 55 aqqutigalugu Inatsisartuni aalajangersaammata. 2019-imi siunnersuut akuerineqarpoq, kisianni suli piviusunngortinneqanngilaq. Taamani Inatsisartut aalajangiinerannut EU-mi aasaanerani nalunaaquttap atorunnaarsinneqarnissaata apeqqutaatinneqarnera tamatumani pissutaavoq. EUmi aasaanerani nalunaaqutaq suli atorunnaarsinneqanngilaq, Siumumit oqaatigineqarpoq.

Inatsisissatut siunnersuut Siumumit siunnersuutigineqatoq Inatsisartuni siorna oqaluuserineqarpoq, Inatsisartunullu qinersisoqarnera pissutigalugu atorunnaarallarnikuulluni.

Siunnersuut novembarip arfernani aappassaaneerneqassaaq, novembarillu 13-ianni pingajussaaneerneqassalluni.