Aaqqissuussaaneq nutaaq: Aqutsisoqarfik atorunnaarsinneqarpoq
Peqqissutsimut Aqutsisoqarfimmi sulisut Peqqissutsimut Aqutsisoqarfiullu annersaata maanna suliassai Peqqinnissaqarfimmut nuunneqarput, Peqqissutsimut Naalakkersuisoq ilisimatitsivoq.
Peqqissutsimut tunngatillugu isumaqatigiissut peqqissutsimut suliassaqarfimmi nutaamik aaqqissuussaanermik Naalakkersuisut malitseqartitsipput, Peqqinnissaq pillugu ataatsimiititaliarsuup inassuteqaataanik tunngavilimmik, Peqqissutsimut Naalakkersuisoq Agathe Fontain (IA) oqaluttuarpoq.
Assi: Leiff Josefsen
Peqqinnissaq pillugu ataatsimiititaliarsuup inassuteqaatai tunngavigalugit, 2023-mi peqqissutsimullu tunngatillugu isumaqatigiissummut atatillugu, peqqissutsimut suliassaqarfimmi nutaamik aaqqissuussaanikkut Naalakkersuisut malitseqartitsipput; immikkoortuni pingaarnerni pingasuni, tassa Naalakkersuisoqarfimmi, Peqqinnissaqarfimmi kiisalu Nunatta Nakorsaaneqarfiani suliassanik akisussaaffinnillu ersarissumik agguataarineq.
Nalunaarusiaq 'Peqqinnissaqarfimmi aaqqissuussaanermik qullersaqarfiup ilusilersugaaneranut naleqqussaanermut'
Peqqissutsimut Aqutsisoqarfiup atorunnaarsinneqarneranik Allorfiullu, pinngitsuuisinnaajunnaarnermik ajornartorsiutinik suliaqartup, Peqqinnissaqarfimmut ilaalerneranik, suliassaqarfittullu namminersortutut immikkut ingerlatsinissamut tapiiffigineqartalerneranik, aaqqissuusseqqinneq kinguneqarpoq.
Allannguutit kingusinnerpaamik 2025-mi januaarip aallaqqaataani atuutilissasut Peqqissutsimut naalakkersuisoq Agathe Fontain (IA) tusagassiuutinut nalunaarummi allappoq:
- Allorfiup peqqinnissaqarfimmut ilanngutsinneratigut naartusunut meeqqallu inuunerissaarnissaannut aanngajaarniutit sunniuteqartarnerannik pitsaaliuinermik suli qaninnerusumik suleqatigiinnissarput neriuutigaara, tassanilu siusinaartumik suliniuteqartarnissaq anguniagaavoq.
-Innuttaasunik tarnikkut nappaateqartunik aanngajaarniutinillu ajornartorsiuteqartunik suleqatigiissutiginninnerit nukittorsarnissaat aamma kissaatigaarput, Agathe Fontain oqarpoq.
Aqutsisut amerlineqarput
Peqqinnissaqarfimmi aaqqissuussaanerup pisariillisarneqarnera ilutigalugu aqutsisut amerlineqarput:
- Peqqinnissaqarfimmik Aqutsisuni aningaasaqarnermut pisortamik kiisalu peqqissaasunut pisortamik allamik sulisoqalernikkut tamanna pissaaq. Aningaasaqarnerup pitsaanermik aqunneqarnerulerneranut aamma Dronning Ingridip napparsimmavissuanik peqqissaavinnillu ingerlatsinerannut aqutsisut amerlineqarnerat pitsanngorsaaqataassaaq, Agathe Fontain, 2022-mi naalakkersuisooqatigiinnissamik isumaqatigiissuteqartoqarmat suliniutip tamassuma isumaqatigiissutigineqarsimaneranut innersuussisoq, oqarpoq.
Nunatta Nakorsaaneqarfiani nakorsat suliassaasa piginnaasaannik kiisalu Peqqissutsimut Naalakkersuisoqarfimmi aningaasaqarnermut inatsiseqarnermullu suliassaqarfimmi annertusaanissaq taakku saniatigut pilersaarutaavoq, naalakkersuisoq oqarpoq.
