Aasianni, Maniitsumi Qaqortumilu Tusassip pisiniarfii matussapput
- Pisiniarfinni pisisartukinnerulerpoq, allakkat ikinnerulerlutillu digitalinngorsaasoqarnerulerpoq. Ukiuni kingullerni Tusassip pisiniarfiutaasa arlallit matunerinut pissutaapput, Tusassip pisiniarfiutaanut taarsiullugu najukkami pisiniarfinnik soorlu Pilersuisumik Brugsenimillu suleqateqarpugut, Tusass matusinissat pillugit ilaatigut nassuiaateqarpoq.
- Pilersuisumik Brugsenimillu suleqateqarpugut, sullitatsinnut ilaatigut najukkami aallertarfeqartitsinissaq, ammasarfinnik eqaannerulersitsinermik kiisalu SIM-kortinik modeminillu tunniussisarnermik eqaannerulersitsinermik tamanna qulakkeerinnissaaq, Tusass-imit oqaatigineqarpoq.
Asseq: Tusass
Ukioq manna aalajangerneqarpoq, Qaqortumi, Maniitsumilu Brugseni aammalu Aasianni Pilersuisumik suleqateqarnissaq. Tamanna isumaqarpoq sumiiffinni taakkunani pingasuni Tusassip pisiniarfiutai aasap ukiallu ingerlanerani matuneqassasut.
- Pisiniarfinnik matusinerput sullitatsinnut, ukiorpassuarni uagutsinnut qanimut saaffiginnittarnerminnik sungiusimannittunut allannguuterujussuunera nalunngilarput. Nunarsuarli sullitattalu atueriaasiat allanngormata tulluussartariaqarpugut, Niuernermi Pisortaq Nikolaj Christoffersen nassuiaavoq.
Tusass tamanna pillugu nassuiaavoq ukiuni kingullerni sullitat atueriaasiat malunnartumik allanngortoq – tamatuma peqatigisaanik allakat ikileriangaatsiarsimasut. Pisiniarfiit akuttunerusumik iserneqartalerput, amerlanerusullu digitalikkut aaqqiissutinik imminullu sullississutinik atuinerulerlutik.
Nuuk, Sisimiut Ilulissallu aallunneqassapput
Ilanngullugu Tusassimit nassuiaatigineqarpoq pitsaanerpaamik sullitanik sullissisinnaajumalluni illoqarfinni pingasuni Tusassimit pisiniarfeqaannartussani nukinnik kattussissaq aalajangerneqartoq: Nuummi, Sisimiuni Ilulissanilu.
Nikolaj Christoffersen nassuiaavoq:
- Periusissiatta pingaarutilittut ilaatut Nuummi Sullissivittaassami nukiit kattutissavavut, tassani sullitatta poortugaataanik, atuisuuffiinik digitalikkullu aaqqiissutaannik ikiorsinnaavavut. Tamannalu innuttaasunut iluaqutaavoq – aamma Nuup avataaniittunut. Ilaatigut suleqatigiit ikiorsiisartut tunniusimasut nuna tamakkerlugu oqarasuaatikkut qarasaasiakkullu ataatsimiinnerit aqqutigalugit sullitatsinnik ikiuinissaminnut piareersimapput.
TUSASSIP PAASISSUTISSIINERA
- Tusassip pisiniarfii Maniitsumi ulloq 23. maaji, Qaqortumi ulloq 25. juuli Aasiannilu 17. oktobari matussapput. Tamatuma kingorna sullitavut allakkanik nassiussinissamut aallernissamullu Qaqortumi, Maniitsumilu Brugsenimi imaluunniit Aasianni Pilersuisumi ikiorneqartalissapput, soorluttaaq SIM-kortinik modeminillu aamma Pilersuisumi, Brugsenimilu tunineqartalissasut.
- Internetimik mobiilimillu atuisuuffinnik isumaginninnerit imminut kiffartuunnikkut Nuummilu Sullissivimmit ikiorneqarnikkut ingerlanneqartalissapput.
- Nuummi Sullissivissami nutaami sullissineq allakkanillu isumaginninneq ataatsimi ingerlanneqartalissapput. 2025-mi ukiakkut ammarnissaa naatsorsuutigineqarpoq.
