Aasianni Utoqqaat illuat suliniutinik arlalinnik ikiorneqassaaq

Peqqissaasut Kattuffiat eqqartuussissuserisut suleqatigalugit Kommune Qeqertalimmi kommunalbestyrelsimut Aasianni utoqqaat angerlarsimaffianni sulisut atugaat pillugit ernumassummik allagaqarput. Sulisut suliassaqarpallaarujussuartut, peqatigiiffimmiit taakkartorneqarpoq.

Kommunip ernumassummut akissuteqaataa kommunalbestyrelsimiit akuerineqartoq, Kommune Qeqertalimmi borgmesteri, Ane Hansen (IA) paasissutissiivoq:

- Suliffeqarfitsinni sulisussanik ilinniarsimasunik pissarsiniarnermipaarinniinnarnissamilu unammillernartut ilisimaarilluarpagut. Tamanna nunatamakkerlugu atuuppasippoq. Tamanna ikiorserniarlugu arlalinnik suliniutinikaallartitsivugut, ilaatigut peqqinnissaqarfimmik suleqateqarneq qulakkeerparput, peqqinnissamut tunngasunik utoqqaat illuanni suliassanik aaqqiinissamut ikiuutaasussamik.

Sulisoqassuseq pissusissamisoortoq

Peqqissaasut Kattuffiata ernumassuteqarluni allakkiamini eqqaavaa, utoqqaat illuanni sulerulunneq annertusoq, tamannalu ingerlatsinermi aqutsinermilu suliassanik akuleriisitsinermit sunnerneqartartoq.

Suliffeqarfimmi sulisoqassuseq kommunip misissorsimavaa, maannakkullu ineqartoq ataasiugaangat sulisut amerlassusiat 1,7-iusoq uppernarsarneqarsinnaasoq, kommuni akissummini allappoq.

-  Tamanna kommunip pissusissamisoortutut nalilerpaa, aamma sulisoqassuseq puigortunngortut ineqarfianni nalinginnaasumillu ineqartut ineqarfianni assigiiginnanngilaq.

Ernumalluni allagaqaammi aamma allassimavoq, sulisut sulisussanangikkaluarlutik sulisussaqannginneq peqqutaalluni suliinnartariaqartarsimasut. Sulisut sulinngiffeqartarnissaat qasuersaartarnissaallu kommunip aamma sulissutigaa.

- Utoqqaat illuanni aqutsisut allaffissornerup tungaatigut ikorfartorneqarnikuupput qitiusumi sulisoqarnermut tunngasunut sulisumit allaffimmiumillu. Naatsorsuutigaarput taamatut ikorfartorneqarnermigut aqutsisup nutaap sulisut suliffissaasa pilersaarusiornerat pitsaanerusoq pilersissinnaajumaaraa, taamaalilluni sulisut piffissami suliffigisassarinngisaminni napparsimasoqarnera pissutigalugu suliartoqquneqaqattaaratik qasuersaarfeqartarniassammata.

-  Kommunip pingaartippaa sulisut qasuersaarnissaminnut naammattumik piffissaqartarnissaat, kipisuitsumik suliartoqquneqariataarnissaminnut piareersimaannavinnatik. Borgmesteri siusinnerusukkut kattuffinnut allakkioreernikuuvoq, akissarsiffiit nalaanni napparsimasoqakulasarnerata ajornartorsiutaanera pillugu. Kommunip neriuutigaa, Peqqissaasut Kattuffiat, ajornartorsiutip taassumap ataatsimoorussamik iluarsiniaalluta oqaloqatigiinnissatsinnut peqataarusussasoq.

Kommune Qeqertaliup naatsorsuutigaa Peqqissaasut Kattuffiat suleqatiginnikkusussuseqarneq aallaavigalugu peqataajumaartoq Kommune Qeqertalimmi utoqqarnik isumaginninnermi ajornartorsiutit aaqqinniarnerini, qilanaarnerarlutillu oqaloqatigiinnerit nanginnissaannut.