Advokatrådi: Kalaallit Nunaanni eqqartuussisut pitsaanerusumik ilinniartinneqartariaqarput
Kalaallit Nunaanni inatsisilerituut amerlanerusut aamma inatsisilerinermi siunnersuineq pitsaanerusoq pisariaqartinneqarput. Advokatrådit nalunaarusiaanni tamanna allassimavoq.
Kalaallit Nunaanni eqqartuussiviit nunat tamat akornanni inatsisitigut
illersugaanikkut piumasaqaatinut naammassinninnissamut inatsisilerituutut ilinniarsimasunik suli
amerlanerusunik amigaateqartut, Advokatrådi naliliivoq.
Assiliisoq: Merete Lindstrøm
Kalaallit Nunaanni eqqartuussivinni inatsisilerinermik suliaqartut piginnaanngorsagaanissaat suli pisariaqartinneqarpoq, naak ukiuni kingullerni pitsanngorsaasoqarsimagaluartoq. Taama isumaqarput eqqartuussissuserisut siunnersuisoqatigiiffiat.
Advokatrådi sisamanngornermi nalunaarusiami nutaami, Dreyers Fondiimit aningaasaliiffigineqartumi, kaammattuutinik saqqummiussivoq. Kalaallit inatsisitigut illersugaanerisa nunat tamat akornanni inatsisitigut illersugaanermik piumasaqaatinut naammassinninnissaa siunertaavoq.
Inatsisitigut pitsaanerusumik ikiorserneqarnissamik pisariaqartitsineq
Tamanna ilaatigut piffinni eqqartuussiviit illersuisunik eqqartuussisunillu inatsisilerinermik ilinniarsimasunik pissarsinissaatigut isumagineqassaaq – ingammillu Kalaallit Nunaat tamakkerlugu piffinni eqqartuussivinni minnerni.
- Innuttaasut inatsisilerinikkut ikiorserneqarnissamut periarfissaqarnerulernissaannut, inatsisilerituumik illersuisoqarsinnaanerannut kiisalu pitsaanerusumik inatsisinik ikiuinermut neqerooruteqarnikkut, inatsisilerituut amerlanerit pisariaqartinneqarput Martin Lavesen oqarpoq.
Tamatuma sanitigut Kalaallit Nunaata eqqartuussiviani inatsisilerinikkut piginnaasat pitsanngorsarneqarnissaat kissaatigaa.
Kalaallit Nunaanni piffinni eqqartuussivinni illersuisut eqqartuussisullu, ukiuni marluinnarni ilinniagsaqaramik, Danmarkimisulli inatsisilerinikkut ilinniagaqarsimasuunngillat.
Advokatrådi siunissamut qaninnermut kaammattuutinik 25-nik, siunissamullu ungasinnerusumut kaammattuutinik sisamanik saqqummiussivoq. Martin Lavesenili naapertorlugu nalunaarusiami kaammattuutit tamaasa piviusunngortinneqarnissaannut aningaasat amerlanerusut pisariaqartinneqarput.
Inatsisitigut illersugaanerup pitsaanerulernissaanut naammanngitsut
- Nalunaarusiatsinni kaammattuutit naammassinissaannut aningaasaqarnikkut piumassuseqartoqarnissaa pisariaqassasoq qularutissaanngilaq. Pineqartumi aningaasanik amerlanernik pisariaqartitsisoqarnera arlalitsigut siunniupparput, taanna oqarpoq.
Qallunaat naalakkersuissui Folketingilu novembarimi 2023-mi piffissami 2024-2027 Kalaallit Nunaanni Savalimmiunilu eqqartuussiviit nukittorsarneqarnissaannut katillugit 58,8 million koruuninik immikkoortitsinissaq isumaqatigiissutigaat.
Ukiunut arlalinnut atuuttussamik isumaqatigiissummi ilaatigut ilinniartitaaneq kiisalu piffinni eqqartuussivinni suliassaqarnerpaani eqqartuussisunik marlunnik eqqartuussivimmilu allatsinik marlunnik amerlanerusunik atorfinitsitseqqinnissaq siunniunneqarpoq.
Tamakkuli inatsisitigut illersugaanerup annertusarnissaannut naammanngitsut Martin Lavesen oqarpoq.
- Danskit naalakkersuisuisa amerlanernik aningaasaliinissaat pisariaqarpoq, neriuutigaarpullu nalunaarusiaq tamatumannga aallussinerulersitsisinnaassasoq, taanna oqarpoq.
