ARNAT
amerliartuinnartut Politiinngorniarfimmi ilinniarusullutik qinnuteqartarput.
Arctic Sounds, festivalimik aaqqissuussisut, nipilersortartut akornanni arnanut
angutinullu kiisalu suiaassutsinut pituttorsimanngitsunut
naligiissitsiniarlutik suliniuteqartarput.
ARNAT
amerliartuinnartut Politiinngorniarfimmi ilinniarusullutik qinnuteqartarput.
Arctic Sounds, festivalimik aaqqissuussisut, nipilersortartut akornanni arnanut
angutinullu kiisalu suiaassutsinut pituttorsimanngitsunut
naligiissitsiniarlutik suliniuteqartarput.
Inuiaqatigiinnili
naligiissitsinermik suliaqarneq aatsaat aallartippoq. Naligiissitaanissaq
pillugu inatsisit amerlasuut pappiaqqami kusanartutut isikkoqarput, kisiannili
inatsisit sumiiffinni amerlanerpaani kusassaatitut atorneqartarpasippoq.
POLITIINNGORNIARFIUP
ineriartornera nuannaarutigineqarlunilu tapersersorneqartariaqarpoq,
piffissamimi pingaarutilimmi nunarsuarmi politikkikkut soqutigisat
annertusiartorneranni innuttaasut tamarmik peqataatinneqarnerannik
ersersitsisarmat. Politiit assigiinngitsorpassuarnik tunuliaqutallit
peqataatitaqartut inuiaqatigiinnik patajaallisaanermik
toqqissisimanerulersitsinermillu kinguneqarsinnaapput, tamatumalu saniatigut
Kalaallit Nunaata demokratii tunngavigalugu naligiissitaanermik
pingaartitsineranut ersarissumik takutitsisuussaaq.
ARNAT
angutillu suliffimmi naligiimmik periarfissaqartariaqartut naligiissitaanermut
inatsimmi allassimavoq, politiinilu allannguineq tamanna naligiinnermik
suliniutit kinguneqarluarnerannut uppernarsaataavoq. Kisitsisilli
naammanngillat. Arnat taamatut aalajangertut ilinniagaqarnermi kingornalu
sulinerminni naligiimmik atugaqarnissaat qulakkeertariaqarparput.
SULIAQARFINNI
allani illuatungianik takusarpugut, tassani arnat oqaluttuarisaanerup
ingerlanerani ikinnerusarput, soorlu nipilersornerup silarsuaani.
Nipilersornermut festivali Arctic Sounds arnat angutillu akornanni
oqimaaqatigiissaarinissaq qulakkeerniarlugu suliniuteqarsimavoq, tassani
eqqumiitsuliortut minnerpaamik 50 procentiisa arnaanissaat imaluunniit
suiaassutsimut pituttorsimannginnissaat qulakkeerniarlugu. Oqaatigisat
iliuuseqarfigineqaraangata allannguineq piviusunngoriartortartoq suliniut tamanna
takutitsivoq. Suliffeqarfiit ilinniarfiillu sulinermi avatangiisit
assigiinngisitaarnermik naligiinnermillu siuarsaasut pilersinnerisigut
maligassiuineq tamanna ilinniarfigisinnaavaat.
TAMATUMA
SANIATIGUT angutit arnallu naligiissinneqarnissaat pingaaruteqarpoq, ingammik
Amerikamiut Issittumik Kalaallillu Nunaannillu soqutiginninneruleriartornerat
eqqarsaatigalugu. USA-mi, assigiinngisitaarnerup tungaatigut siuttuusimasumi,
angutit arnallu naligiissinneqarnerat kinguariarsimavoq, maannalu
assersuutigalugu suiaassuseqatiminnik allanngortitsisut pisinnaatitaaffii
ikilisinneqarsimapput. Kingumut
ingerlassanngilagut. Assigiinngisitaarnerup nukittorsaaffiginissaa
pingaaruteqarpoq. Tassani ineriartortoqartarpoq.
ARNAT
amerlanerusut Politiinngorniarfimmi ilinnialertarnerat alloriarneruvoq
pingaarutilik. Kisianni taakkua atorfimmiiginnarnissaat qaffakkiartornissaallu
qulakkeerniarlugu inuiaqatigiittut naligiissitaanermik suli
nukittorsaaniartariaqarpugut. Matup ammarnissaa naammanngilaq – kikkut tamarmik
aqqusaassallugu periarfissaqarnissaat inissisiumaffimminiissinnaanissaallu
qulakkeertariaqarparput.
