KL

DK

Air Greenland 7.000-nik ilaasortaqartitsinissamik isumaqatigiissuteqarpoq

Ukiup 2025-p aasarisseruttornerani Air Greenland København aamma Nuuk akornanni kiisalu Nuuk aamma Keflavik akornanni Hurtigruten Expeditionsimut ilaasortanik aamma inuttaqartunik 7.000-nik angallassissaaq.

Air Greenland
Air Greenland
KASSAALUK KRISTENSEN
Digitalimik aaqqissuisoq
Saqqummersinneqarpoq

2025-mi aasaanerani Air Greenland København aamma Nuuk akornanni kiisalu Nuuk aamma Keflavik akornanni ilaasunik 7.000-nik angallassisassaaq, Hurtigruten Expeditionsimi ilaasussat aamma inuttat angallattassallugit.

Air Greenland aamma norskit umiarsuaatileqatigiiffiata Hurtigruten Expeditionsip akornanni isumaqatigiissut taama qulakkeerinnittoq, Air Greenland tusagassiutinut nalunaarummi ilisimatitsivoq.

Air Greenland-imi pisortaq Jacob Nitter Sørensen isumaqatigiissummut iluarisimaarinnippoq:

- Hurtigruten Expeditions ukiorpassuarni oqaloqatigereerluni isumaqatigiissut manna, angallavinni unammillerfiulersussani ilaasutta amerlanerulernissaannik qulakkeriffigiinnarnagu, aamma inuiaqatigiinnut sunniuteqarluartussaasoq saqqummiussinnaagatsigu tulluusimaarutigaarput. Taamaalilluni ilaasussanut taakkununnga Kalaallit Nunaanni sinersorlutik angalannginnerminni angalareernerminnilu takornariarnissamut ammaassisoqassaaq, tamannalu najukkani takornariartitsisartunut iluaqutaassaaq, Jacob Nitter Sørensen oqarpoq.

Timmisartuussinerit umiarsuit takornariartitsisartut M/S Fridtjof Nansen-ip aamma M/S Roald Amundsen-ip sinersorlutik angallassineranni ilaasut inuttallu paarlaannerinut atatillugu ingerlanneqartassapput. 

Sumiiffinni inuiaqatigiinni suliniutit piujuartitsisut tapersersussavai

Air Greenlandip nuannaarutigaa Hurtigrutenip piujuartitsinermut sammisumik qitiutitsinerata kalaallit inuiaqatigiinnut iluaqusiinissaa:

- Hurtigruten-ip imaatigut angallassiinnarnissamit annertunerunerusumik sunniuteqarnissani kissaatigigaa malunnarpoq. Takornariat sinersortitatik aamma najugaqavissunik ilisimasaannillu atuillutik misigisaqartinnissaat pingaartippaa, najugaqavissut maani nunatsinni nalilinnik pilersitsinissaat kissaatigineqarluni, Jacob Nitter Sørensen oqarpoq. 

Hurtigruten Expeditions-imi CEO Daniel Skjeldam nassuiaavoq, tunisassiatik takornariartitsinermik piujuartitsilluni ineriartornissamut tunngavissanut naapertuuttussaasut. 

- Air Greenlandimut isumaqatigiissuteqarnitsigut Kalaallit Nunaanni piviusunik piujuartitsiffiusunillu misigisaqartitsinissamut periusissiornitsinni killiffik pingaarutilik anguarput. Najukkani inuiaqatigiinni nalilinnik pilersitsiortornermut iluaqutaanissarput, aammalu Kalaallit Nunaata sinersorluni takornariartitsisarnermi ornigassatut pilerinartutut inissinnissaanut nukittorsaaqataanissarput qilanaaraarput. Piujuartitsineq pingaartillugu maaniippugut, Daniel Skjeldam oqarpoq. 

Isumaqatigiissummik atsioqatigiinneq pisortatigoortumik Nuup Umiarsualiviani pingasunngornermi juunip 19-anni nal. 10.30 ingerlanneqassaaq, tassani umiarsuaq angallassisoq M/S Fridtjof Nansen talittarfimmut tulassaaq. Oqalugiartoqassaaq, kulturikkut takutitsisoqassalluni kiisalu umiarsuaq kikkunnut tamanut, kinaassutsimik uppernarsaammik nittarsaassisinnaasunut ammatinneqassalluni.

passagertransport nuuk københavn island inuiaqatigiit flyrute air greenland samfund

ATORFIIT Se alle jobs

Powered by Labrador CMS