KL

DK

Air Greenland bilitsit akiinik qaffaallunilu appaavoq

Nuummi mittarfik novembarip 28-ani atulerpat timmisartuussinissamut pilersaarummi atuutilertussami, Air Greenland akinik nalimmassaaniarluni ulapippoq. Tamanna sapaatip-akunneri marluk matuma siornatigut Sermitsiaq.AG-p akinik misissuineranut sanilliullugu akit qaffasinnerunerinik appasinnerunerinilluunniit isumaqarsinnaavoq.

Journalist
Offentliggjort

Nuummi mittarfik nutaaq atulerpat Ilulissaniit Københavnimut utimullu bilitsi akikinnerpaaq 2.080 koruuninik qaffassasoq, marsip tallimaani akinik misissuinerup takutippaa. Atulinnginnerani atulerneratalu kingorna 6.193 koruuninik 8.273 koruuninillu akeqartoq akinik misissuinermi takuneqarsinnaavoq, tassa 2.080 koruuninik qaffassimavoq.

Ilulissani innuttaasut Københavnimut angalaniarlutik Kangerlussuakkoornatik Nuuk aqqusaarlugu angalasariaqalerneranik akit qaffarujussuarnerat nassuiarneqarsinnaavoq, tamannalu sivisuneruvoq. Aappaaguli ukiuunerani timmisartuussinissami Air Greenland suli akinik nalimmassaasimannginnera paasinarsivoq.

Sooruna?

Nuummi mittarfissaq atulerpat Ilulissanit Københavnimut angalaneq sooq 2000 koruuninik akitsoriasaarsimanersoq, Air Greenland aperaarput.

- Akit assersuutit erseqqissarneqartut ullormi tassani akit inniminniinermut atortumi “immersugaapput”, ullormi tassaneqqissaaq akit aasaallutik. Tassunga atatillugu aqqutit taakkuupput tuniniaaffigineqarnikuusimanngitsut, soorlu Ilulissaniit Københavnimut Nuuk aqqusaarlugu aqqut, ingammillu misissuiffigisariaqartumiittut. Tamanna ataavartumik suliaasarpoq, timmisartuussinerillu tusindilikkuutaammata misissuineq tamanna, akit assersuutigineqartut aallaavigisaat, suli naammassisaanngilaq, Air Greenlandimi attaveqaqatigiinnermut pisortaq Inga Dora G. Markussen, Sermitsiaq.AG-mut nassuiaavoq.

Københavnimiit Ilulissanut uternermilu akit nalimmassarneqarnerat 1.307 koruuniussammat Ilulissani innuttaasunut nuannaarutaassaaq. Taamaalilluni timmisartuutileqatigiiffiup inniminniinermut atortuatigut marsip tallimaani akit Sermitsiaq.AG-p pissarsiarisimasaanut sanilliullugit 773 koruuninik appartinneqarput.

Bilitsit akisunerusut

Assersuutigalugu misissuinermi Nuummiit Københavnimut utimullu bilitsi 3.693 koruuninik akeqarsimavoq, tassa ullumikkut bilitsinut akigititanut naleqqiullugu 3.800 koruuninik akikinnerusimalluni.

Taarsiullugu illoqarfiit pingaarnersaasa taakkua marluk akornanni bilitsi akikinnerpaaq 4.990 koruuniuvoq, taamaalillunilu 3.800 koruuniunngitsunik 2.503 koruuninilli sipaaruteqartoqassaaq.

Timmisartuussinissamut pilersaarummi nutaami, nunap iluani timmisartuussinermi akit ilisimaneqartutut attanneqarnissaat siunertaasoq, Air Greenland ilisimatitsivoq.

- Tamanna ersersinniarlugu Ilulissaniit Nuummut uterlugulu timmisartumik angalanermut Takussip akii allanngortinnagit 4.990 koruuniusut allaaserisami assersuutaavoq, mittarfimmut akitsuutit ilanngullugit.

Aqqut taanna pioreerpoq, taamaattumillu tuniniaanermut tunngatillugu paasissutissat atortorissaarummi pioreerlutik.

- Nuuk novembarip 28-anit timmisartunut qitiusumik angallassiffiulernissaa sioqqullugu kingoqqullugulu akit assigiinngissuteqannginnerinut, nunap iluani angallannermi akit taamaatiinnarneqarniarnerinut kissaateqarnermik pissuteqarpoq – angalanerit pisariaqartitallu ilisimaneqartut allanngortinneqanngingajassapput. Takuss-imik Ilulissaniit Nuummut utimullu bilitsi 4.990 koruuneqarpoq. AUL-imik angalalluni bilitsimut akikinnerpaamut assinguvoq, ullulli aappaa avillugu angalasariaqanngikkaluarluni, aqqutaanilu nerisassanik pisisariaqanngikkaluarluni, Inga Dora G. Markussen oqarpoq.

Timmisartortitseqatigiiffiit nalinginnaasumik atuisup pisariaqartitai naapertorlugit assigiinngitsunik akeqalersitsisarnerat maluginiarneqarsinnaasoq erseqqissarneqarpoq.

Akinut malussarissuseq

- Atuisut ilaat akinut malussarisorujussuupput taamaallaallu akikitsumik bilitsisiortarlutik, taamaakkaluartorli piffissaq sivisooq angalanissaq naleqqussarsinnaannginnerlu akueriumavaat – bilitsi allanngortinneqarsinnaanngilaq utertinneqarsinnaananiluunniit – aamma bilitsit amerlassusaat killeqarmata siusinaarluni pisiarineqartariaqartarput. Atuisut allat, soorlu sulinermut atatillugu angalasut, piffissaq sivikitsoq sioqqullugu angalanissamut inniminniisarput, piffissaat nalitunerusarpoq pilersaarutitillu allanngortikkajuttarpaat, taamaattumillu naleqqussarsinnaaneq pisariaqartittarpaat, akiliinerusarpullu, attaveqaqatigiinnermut pisortaq oqarpoq.

Ukiup qanoq ilinerani pisiniartoqarnersoq pisiniartullu qanoq amerlatiginersut apeqqutaatillugit piffissap ingerlanerani akit taamaattumik allanngorarsinnaapput.

- Air Greenlandip, suliffeqarfiit allat assigalugit, tunisassiaminik sapinngisamik akitigut naleqqunnerpaamik tuniniaanissaq anguniagaraa, atuisut piffissami sivikitsumi sivisuumilu pisariaqartitaat assigiinngitsut matussuserniaatigalugit, Inga Dora G. Markussen erseqqissaavoq.

samfund inuiaqatigiit

ATORFIIT Se alle jobs

Powered by Labrador CMS