Air Greenland Iqalunnut timmisartuussisalissaaq
Air Greenland juunip ulluisa 26-aniit oktobarip tungaanut Nuummiit Iqalunnut toqqaannartumik timmisartuussisalissaaq. Sapaatip akunneri tamaasa pingasunngornermi timmisartuussisoqartassaaq, tassani aamma Canadami illoqarfik pingaarnersaat, Ottawa, aamma illoqarfissuaq Motreal, Nunavimmilu Kuujjuaq ulluinnarlugu tikinneqarsinnaaneri periarfissaalissaaq. Tamanna piviusunngorpoq Air Greenland Canadian Northilu suleqatigiinniarlutik isumaqatigiissuteqaramik.
Saamimmiit takuneqarsinnaapput Air Greenlandimi siulersuisuni siulittaasoq, Malik Hegelund Olsen, Shelly De Caria, Canadian Northimi pisortaaneq, Air Greenlandimi pisortaaneq, Jacob Nitter Sørensen kiisalu Johnny Adams, Canadian Northimi siulersuisuni siulittaasoq.
Foto: Air Greenland
Nunatsinni innuttaasut Iqalunnut aasamut timmisartumik toqqaannartumik angalasinnaalissapput.
Air Greenland juunip ulluisa 26-anniit Nuummiit Nunavimmi illoqarfiit pingaarnersaannut, Iqaluit tungaannut aasaaneraniit oktobarip ulluisa 23-at tikillugu timmisartuussisalissaaq.
Air Greenland tusagassiuutitigut nalunaarumminni nalunaarutigaat pingasunngornerit tamaasa Iqalunnut timmisartuussisarsinnaassallutik, ullorlu taanna Canadami illoqarfiit pingaarnersaannut, Ottawamut, illoqarfissuarmut Montrealimut aammalu Nunavimmi Kuujjuarmut ingerlariaqqinnissamut periarfissaqassasoq.
Tamanna Air Greenlandip aammalu timmisartuutileqatigiiffiup Canadian Northip sapaatip akunnikkaarlutik sumiiffinnut aalajangersimasunut timmisartuussisarnissamik isumaqatigiinneranni pisinnaalerpoq.
Piorsarsimassuseq pillugu suleqatigiinnerulerneq
Nunavut Kalaallit Nunaata akornanni timmisartuussisalernissamut 2022-mi suleqatigiinnermut isumaqatigiissutigisaata sivitsornerigaa, Air Greenland ilisimatitsivoq.
Tassani isumaqatigiit illugiittut kulturip, ilinniartitaanerup, aalisarnerup nukiillu piujuartitsisup suleqatigiissutigineri pitsaanerulersinniarlugit minnerunngitsumillu angalanerup eqaannerulernissaanut aqqutissiuinissaq kissaatigaat. Kingullerlu pineqartoq piviusunngulerpoq.
- Nalunngilarput Nunavut Kalaallit Nunaatalu suli qaninnerusumik suleqatigiinnissaat annertuumik kissaatigineqartoq, attaveqaqatigiinnerlu qulakkiissagutsigu kitaatungitsinnut aqqutissaqalernissaa pissusissamisoorpoq. Isumaqarpugut inuussutissarsiornikkut, politikkikkut kulturikkullu assigiissuterpassooreersunut iluaqutaajumaartoq, Air Greenlandimi siulersuisuni siulittaasoq Malik Hegelund Olsen, oqarpoq.
COVID-19 kinguaattoorfiusoq
- Canadian Northimi Air Greenlandimilu 2020-mi januaarimili nunarsuarmi immikkoortutta marluusut akornanni attaveqalernissaq sulissutigaarput, tassani siunnerfinnut nalunaarut atsioratsigu. Suliaq COVID-19-ip nunarsuarmi tuniluunnera peqqutigalugu kinguaattooraluartoq sulinerput ingerlatiinnarparput, Johnny Adams, Canadian Northip siulersisuini siulittaasoq oqarpoq nangillunilu.
- Angallaviup taassuma atuutilernera, issittumilu immikkoortunut ataqatigiissitsilernera nuannaarutigisorujussuuarput, Adams naggasiivoq.
Sapaatip akunneri tamaasa timmisartuussineq
Aqqut junimiit oktobarip tungaanut aallaqqaammut pissaaq, piumaneqarneralu annertuppat sivitsorneqarnissaa periarfissaasoq, suleqatigiit paasissutissiissutigaat.
- Kalaallit Nunaannut kivitseqataanissaq angorusupparput, Iqalunnullu aqqutip ammarnerani nunatta naggueqatitsinnik suleqateqarnerulernissaannut iluaqutaangaassaaq. Issittumi nunat tikeraarusunneqarnerat kingullermik illoqarfinni pingaarnerni marluusut akornanni 2014-imi aqquteqarneranut naleqqiullugit annertunerulernikuuvoq. Isumaqarpugut aqqutip tassuma ammaqqinnissaanut piffissaq piumaneqassusaalu naleqquttoq, Jacob Nitter Sørensen oqarpoq.
Canadian Northilu timmisartuusseqatigiinnissamut isumaqatigiissut
Iqalunnut aqquteqalernermi Canadami illoqarfiit pingaarnersaannut, Ottawamut, Iqalunnit 2100 kilometerinik kujasinnerusumiittumut, illoqarfissuarmut Montrealimut aammalu Nunavimmi Kuujjuarmut ingerlaqqissinnaanissaq aamma periarfissanngussaaq. Tamaammat siunissami tikiffissat taakku marluk suliffeqarfiit nittartagaanni toqqaannaq inniminneqarsinnaanngussasut.
- Canadian Northip suleqatigilernera iluatsimmat nuannaarutigingaarpara, siunissami angalasussat namminneerlutik ingerlariaqqiffissat allat pingasuusut tungaanut billetinik inniminniisinnaalissammata. Taassumap ineriartornerata malinnaaviginissaa pissanganarpoq, maanimiullu kimmut angalatinnissaat aammalu Nunavummit Canadamillu tikinneqartalernissarput qilanaaraarput, Air Greenlandimi pisortaaneq, Jacob Nitter Sørensen oqarpoq.
Canadian Northip pisortaanerup, Shelly De Cariap suleqatigiilerneq nuannaarutigalugu aamma oqaaseqarpoq:
- Takornariarnerup, nunat kulturillu akornanni suleqatigiinnerup aningaasarsiornermilu ineriartornerup ingerlalluarluarnerulernissaanut suleqatigiinnikkut peqataanissarput qilanaaraarput, oqarpoq nangillunilu:
- Timmisartuutsitsinerup saqqummiunnerani Canadian Northip inuiaqatigiit akornanni attaveqatigiinnissamut suleqataarusussuseqarnera kulturikkullu attaveqarnerput ersersinneqarpoq, Shelly De Garcia naggasivoq.
