Air Greenland: – Oqummik pasitsaassinerit tamatigut iliuuseqarfigisarpagut
Timmisartortartoq sulisinnaajunnaarnerminut 4 millionit koruuningajannik Air Greenlandimit taarsiiffigineqarpoq. 2014-imi Air Greenlandip inissiaataata oqoqarnera pissutigalugu timmisartortartup puakkut ajornartorsiuteqalernini eksemilerninilu pissutigalugit taarsiiffigineqarpoq. Air Greenland maanna nalunaarpoq sulisunut tamanut isumannaallisaanikkut pitsaasunik aaqqissuussaqarlutik.
Air Greenland
Leiff Josefsen
FPU-mi ilaasortaq sulisinnaajunnaarnerminut
3.950.000 koruuninik taarsiiffigineqaqqammerpoq. Ilaasortaq qulimiguulimmik
timmisartortartuusoq, piffissap ilaani Air Greenlandip inissiaani
najugaqarsimavoq.
Taassuma inaa, Air Greenlandimit 2014-imi
najugaritinneqartoq oqoqarsimavoq.
Sulisitsisut kattuffiillu ukiorpassuarni
isumaqatigiinngissuteqareerlutik, timmisartortartoq sulinermini oqummik
nalaanneqarsimasoq pillugu isumaqatigiissuteqarput. Atuagassiaq
Luftfart nittartakkamini taama allappoq.
- Timmisartortartup suliaq inuussutissarsiutigalugu
nappaateqarnertut nalunaarutigisimavaa. Sulinermik ajoqusernermut oqartussat
aallaqqaammut nappaatip ineqarnerullu imminnut attuumassuteqarnerat
upperinngilaat. Timmisartortartup aalajangiineq kingorna apeqquserpaa,
takuneqarsinnaasullu malillugit sillimmasiisarfiup timmisartortartunillu
kattuffiup isumaqatiginninniarneratigut suliaq aaqqinneqarpoq, Air Greenlandimi
sulisoqarnermut pisortaq Mads B. Christensen oqarpoq.
Sulisoqarnermut pisortap paasissutissiissutigaa sulisut
tamarmik pitsaalluinnartumik isumannaallisaaffigineqartut:
- Sulisut tamarmik isumannaatsuunissaat qulakkeersimavarput,
tamannalu timmisartortartut sulisut isumannaatsuunissaat eqqarsaatigalugu
sillimmasiissutigisimasatsinnit taarsiiffigineqartarnerannut tunngatillugu
maligassaalluarpoq, Mads B. Christensen oqarpoq nangillunilu:
- Air Greenlandimi inissiat nalinginnaasumik ajunngillat,
oqoqarneranillu pasitsaassisoqaraangat tamatigut iliuuseqartarpugut.
Timmisartortartup puakkut ajornartorsiuteqarnini eksemerninilu pissutigalugit timmisartuussisinnaanermut allagartani nutartertissinnaanngilaa, tamatumalu kingunerisaanik sulisinnaajunnaarpoq.
