Air Greenland: Taamaammat Kangerlussuarmukarnaveersaarpugut
Nuummi arfininngormat silarlunnera pissutigalugu Tuukkaq missinnaajunnaarluni Københavnimut utiinnarnera Air Greenlandip nassuiaateqarfigaa. Kangerlussuaq Keflavikkiluunniit aatsaat periarfissatut kingullertut atorneqartassasut timmisartortitseqatigiiffik ilisimatitsivoq.
Tuukkaq siullermeerluni Nuummut novemberip 28-iani tikimmat. Arfininngormat Københavnimit Nuummut timmisartoq silarlunnera pissutigalugu uteqqiinnarpoq.
Assit toqqorsivianiit: Leiff Josefsen
Timmisartorsuaq Tuukkaq arfininngormat Københavnimiit Nuummukaarnerani Nuummi sila ajortimmat timmisartullu minnissaa isumannaatsuujunnaarmat Københavnip mittarfianut utiinnartariaqalerpoq.
Nuummi mittarfissuup nutaap novembarip 28-ani atulerneraniilli timmisartorsuaq perngaammik nalinginnaasumik timmisartuussisinnaajunnaarpoq.
- Sooq Air Greenlandi Københavnimut uterani Kangerlussuarmukaannanngila?, nutaarsiassaq Sermitsiap arfininngormat allaaserimmagu inuit attaveqaqatigiittarfiisigut taama apeqqutilliisoqarpoq.
Pissutsit pingasut
Air Greenlandip Sermitsiamut sukumiisumik nassuiaat nassiuppaa, pissutsillu pingasut tikkuarlugit:
- Københavnip mittarfianit aallarnissaq sioqqullugu silarlulerpat timmisartuussinissaq taamaatiinnarneqassaaq. Air Greenlandip angallannermi pilersaarummi immikkut timmisartuussinissat qulakkeeqqavai.
- Aallareernermit akunnerit marlussuit qaangiuttut ilimaginngisamik silarlulerpat Tuukkaq Kastrupimut utissaaq.
- Tuukkaq Nuummut mereersoq silarlulerpat, aallarfissaa unnummut kinguartinneqassaaq, ilaasussalluunniit kingusinnerusukkut aallarnissaannut inniminniissunneqassapput.
- Kangerlussuaq miffissatut periarfissatut kingullertut aatsaat atorneqassaaq, Tuukkaq Nuummut missinnaanngikkaangat, Københavnimullu uternissaminut orsussakilliussappat (tamanna pillugu ataani paasisaqarnerugit). Taamaattoqartillugu ilaasut Tuukkamik tikittut nunattalu iluani allamut ingerlasut Dash-8-mik timmisartuunneqassapput. , Air Greenlandip attaveqaqatigiinnermut immikkoortortaqarfia ilisimatitsivoq.
Islandip illoqarfiani Keflavikkimi Kangerlussuarmilu mittarfik taamaallaat immikkut ittumik periarfissatullu kingullertut atorneqartassasut timmisartortitseqatigiiffiup erseqqissarpaa.
Kinguneri
- Kangerlussuarmut Keflavikimulluunniit mikkaanni tamanna sullitatsinnut kinguneqassaaq, inuttat sulisut qasuersaarfissaat pillugu malittarisassat pissutigalugit. Tassami sulisut qasuersaarnissaannut malittarisassat tassunga missagaluaraanni kingorna aallarasuaqqinnissamut periarfissiinngillat, sulisut qasuerseqqaartariaqarmata, aatsaallu aqaguani ingerlaqqittoqarsinnaassammat, Air Greenland paasissutissiivoq nangillunilu:
- Tamannalu kinguaattoornernik kinguneqqassaaq.
Timmisartuussinissatut pilersaarutit allat atuisut aningaasaqarnerlu eqqarsaatigalugit suliaasut Air Greenlandip erseqqissarpaa.
Ilaasup pisinnaatitaaffii
- Taava kinguaattoornerit aamma aallanngitsoornerit pinngitsooratik pisut, ilaasut pisinnaatitaaffeqarput EU-p inatsisaatigut EU-miit aallartutut, Air Greenlandip paasissutissiivoq, ilaasunut taamaatitsinermik eqqugaasunut paasissutissat sukumiinerusut uani atuarneqarsinnaasut aamma innersuuppai: Angalanera kinguaattoorpoq
