Air Greenland timmisartumik marlunngornermi attartortoq - silarlunnerali suli ajornartorsiutaavoq
Nuummi anorlernera marlunngornermi ualikkut sakkukillissasoq ilimagineqarpoq. Air Greenlandip angalasorpassuit kinguaattoortut angallanniarlugit timmisartumik attartorpoq. Sinerissalli sinnerani timmisartuussinissarpassuit suli taamaatiinnarneqartaarput.
Anorersuit sakkortuut aammalu anorersuup navianartua Air Greenlandip aammalu timmisartuutileqatigiiffiit allat timmisartuinik ulluni kingullerni arlalinnik taamaatitsisarsimapput. Atlantikoq qulaallugu timmisartut arlallit marlunngornermi ullumi timmisussatut naatsorsuutigineqarput.
Foto: Leiff Josefsen
Air Greenlandip timmisartuutileqatigiiffiillu allat ulluni kingullerni anorersuarnera pissutigalugu Nuumminngaanniiunerusoq angallassinissartik taamaatiinnartarpaat.
Air Greenlandip timmisartuussinissamik pilersaaruteqarluni maanna nalunaarutigaa, tamannalu marlunngornermi juulip arfineq-pingajuanni aallrtissaaq. Air Greenland kinguaattoortorpassuit angallanniarlugit timmisartumik attartortoq timmisartuutileqatigiiffiup nittartagaani atuarneqarsinnaavoq.
- Ippassaq ullumilu angallassinerit kingusinaarnerat aaqqiiviginiarlugu, maanna timmisartumik allamik immikkut attartorpugut. Nuummi, Maniitsumi Sisimiunilu suli sakkortuumik anoraasuasarpoq, tamannalu silaannaap aalarulunneranik kinguneqarsinnaammat Nuummiit Dash-8-p timminissaanut killiliivoq, Air Greenland allappoq.
- Nunap iluani tassa Kujataani- aammalu Avannaani angallassinerput killeqarsimavoq, timmisartuutigullu arlallit silap atoruminarsinissaata tungaanut mitsimaannartariaqarsimapput. Taamaattorli oqaatigisinnaavarput, nunap iluani angallassinissaq pillugu aqagu marlunngornermi juulip arfineq-pingajuani annertuumik pilersaarusiortussaagatta, Nuummiit Ilulissaniillu timminerit atlantiku ikaarlugu timmisartuussinissamut atassuserneqassallutik.
Ullut ataatsip ingerlanerani aallartussarpassuit
Timmisartortitseqatigiiffimmi sulisut marlunngornermi ulapaarniarpasipput, taakkumi aallartussat tikittussallu ataqatigiissartussaassavaat.
Timmisartorsuit tallimat Nuummut marlunngornermi tikinnissaat pilersaarutaavoq, aamma Nuummiit atlantikoq qulaallugu timmisartuussinerit tallimat pilersaarutaallutik. Aallartussaq siulleq Nuummiit Kangerlussuaq aqqusaarlugu Københavnimut timmisartuussisussatut pilersaarutaasoq ullaaq manna suli anorlerpallaarnera pissutigalugu taamaatiinnarneqarpoq. Timmisartut Dash 8-t allat aamma ullaaq manna taamaatiinnarneqarput.
- Malugiuk, angalasussat ilaat nutaamik angalanissamut pilersaaruteqalermata pingasunngornermi juulip 9-iani aallartussamik. Angalasussat taakku aqagu nutaamik paasissutissiilerutta immikkut ittumik sullisissavagut, timmisartuutileqatigiiffik allappoq.
Air Greenlandip Nuummi mittarfimmi nassatanik namminneq tunniussisarfik atoqqullugu angalasunut kaammattutigaa. Taamaaliornikkut ajornannginnerusumik aallarnissamut nalunaarsortoqarsinnaammat.
Unnuiffissaaleqisoqartoq
Sapaatip-akunnerani kingullermi timmisartuussinerit arlallit taamaatiinnarneqarmata angalasut arlallit unnuiffissaqannginnertik tupigusuutigaat, ingammik Nuummi.
Air Greenland unnuiffissanik ujartuivoq, angalasullu kinguaattoortut inuit angerlarsimaffiini unnuinissamik periarfissaqarnersut namminneq misissoqqullugu piumaffigalugit. Tamanna iluaqutaalaarsimavoq, Air Greenlandilu ikiuuttunut qujavoq.
Angalasunut kinguaattoortunut nerinissamik uppernarsaatit inuit attaveqaqatigiittarfiisigut tuniniarneqarnerat Air Greenlandimit aamma tupigusuutigineqarpoq. Taakku timmisartuutileqatigiiffimmit kinguaattoortunut tunniunneqartarput tuniniarneqaqqittussaanngitsullu Air Greenlandimit naqissuserneqarput.
