Air Greenland: Timmisartuussinerit taamaatiinnarneqarnerannit ilaasut 2.400-t eqqugaasut
Sapaatip-akunnerani matumani ataasinngornermit sisamanngornermut Kitaani tamarmi silarluttoqarnera pissutigalugu Air Greenlandip timmisartuussinerit 99-it taamaatiinnartariaqarsimavai. Tamanna pissutigalugu ilaasut 2.400-t eqqugaapput.
Pujornera erseqqarlunneralu pissutigalugit Air Greenland timmisartuussinissaminik 99-inik taamaatitsiinnarpoq, taamaattumillu ilaasut 2.400-t apuuffissaminnut apuutinngitsooqqapput.
Ataasinngornermi juulip arfineq-pingajuaniilli maannammut taamaatitsinerit 99-rsuupput, taamaammallu sineriak tamakkerlugu inuit amerlasuut suli eqqugaaqqapput. Pujornera erseqqarlunneralu pissutigalugit ilaasut 2400-t ingerlariaqqissinnaanngillat. Taama Air Greenland Facebookimi quppernermini sisamanngornermi ualikkut allappoq.
- Ilaasut 2400-t ingerlariaqqissinnaannginnerannut, maannalu angalanermik ingerlaqqinnissaaminnut utaqqiinnartunut pujornera erseqqarlunneralu peqqutaapput. Tamanna sineriak tamakkerlugu ilaasunut, aammali Iqalunnut Iqalunniillu angalasunut kiisalu Danmarkimut eqquivoq, timmisartortitseqatigiiffik allappoq.
Kalaallit Nunaanni aasaq nillerpoq, 5 gradit missaannik kiassuseqarluni, sumiiffinnilu arlalinni pujorluni. Kujataani sikorsuit ulluni arlalinni aamma pujortitsipput, taamaattumillu timmisartortitseqatigiiffik pilersaarutiminik malinninnissaminut ajornakusoortitsilluinnarpoq.
Ikkussortagarujussuaq suliarineqarpoq
- Pisuni immikkuullarissuni taamaattuni kikkut tamarmik sunnerneqartarput. Ingerlatsinermut suliallit, ingerlatitsisunik immikkoortortaqarfik, hangari, inuttat mittarfiillu uani pineqarput. Kikkut tamarmik aaqqiissutissanik ujaasipput. Suliassaq ikkussortakkatut immikkuualuttunik 2.000-nik katiteriffissaasutut, nunami ussissumi pujortumiittutut eqqaanarsinnaavoq.
- Pisut taamatsillugit ikkussortakkat inissitsiterujoorpagut, pilersaarusiornermilu eqqaamasassaararpassuaqarpoq. Ilaatigut inuttat eqqarsaatiginissaat, ingerlaqqinnermit ikkussuineq, unnuinissamut periarfissat, mittarfimmi atortut, timmisartut amerlassusaat, mekanikerit minnerunngitsumillu silassaq.
Ilaasut paasinnissinnaanerat naammagittarsinnaanerallu Air Greenlandip neriuutigaa.
