Air Greenlandip ammasarfiit sivikilligai
Air Greenlandip atuisunut kiffartuussivianut attaveqarniaraanni maanna nalunaaqutaq marlunngortinnagu sianertoqartariaqarpoq, sapaatikkullu matoqqasassaaq. Sulianik tatineqangaarneq pissutigalugu sulisut ilorrisimaarnerannut sunniuteqarpoq, Air Greenland nassuiaavoq.
Assi: Oscar Scott Carl
Air Greenlandip atuisunut kiffartuussivimmi ammasarfii sivikillivai. Atuisunut kiffartuussivik ulluinnarni ullaakkut arfineq-pingasuniit ualikkut marluk tungaannut, arfininngornermilu ullaakkut quliniit ualikkut marluk tungaannut maannamiit ammasassallunilu sapaatikkut matoqqasassaaq.
Ammasarfiit nutaat piffissami aalajangersimasumi atuutissapput, Air Greenland allappoq. Kalaallit Nunaanni silaannakkut angallannerup ajornartorsiorfiusup nalaani sulisut tatineqarpallaarnerat pissutigalugu taama aalajangertoqarsimavoq.
– Saaffiginninnerpassuit piffissami sivitsortumi Call Centerimi sulisugut pikkorissut annertoorsuarnik suliassaqartittarsimavaat. Sulerulunnerup kingunerisaanik toqqissisimaneq sunnerneqariartulerpoq, tamannalu ilungersuutingaatsiarlugu isigaarput. Suleqatigut paarisussaavagut, aammalu nalunngilarput, toqqissisimaneq ilissinnik sullissinitta kissaatigisatsinnik ingerlanissaanut pingaaruteqartoq, Air Greenland allappoq.
Ulluinnarni ammasarfiit akunnernik sisamanik, arfininngornerni akunnernik pingasunik sapaatinilu akunnernik arfineq-marlunnik sivikillineqarput. Taamaalilluni atuisunut kiffartuussivimmi sapaatip-akunneranut ammasarfiit akunnernik 30-nik sivikillissapput. Ammasarfiit nutaat qaqugumut atuutissanersut allassimanngilaq.
Air Greenlandip Facebookimi quppernerani allaaserisaq tamaat ataani takuuk.
