Air Greenlandip Atlantikoq qulaallugu timmisartuussisarnini annertuserujussuassavai

Aappaagu innuttaasut nunap avataani Københavnimut Billundimullu angalanissamut periarfissaqarnerulissapput.

Nuummi mittarfissap nutaap naammassineqareernerata kingorna nunanit allanit Kalaallit Nunaannut angalasartut aappaagu amerliartupiloornissaat, Jacob Nitter Sørensenip ilimagaa.

2025-mi Atlantikoq qulaallugu timmisartuussinerit amerleriarujussuassamaarnerannut tamanna nassuiaataavoq.

Timmisartuutileqatigiiffiup qanittukkut nalunaarutigaa Albatros Arctic Circle suleqatigilersimallugu, taamaalilluni sapaatip-akunneranut marloriarluni Københavnimit Kangerlussuarmut aqqusaarluni Nuummut timmisartuussisoqartalissaaq. Qaammatini arfineq-marlunni, marsimit oktobarimut, aqqutip ammanissaa pilersaarutaavoq.

Atlantikoq qulaallugu immikkut timmisartuussinerit

2025-mi Atlantikoq qulaallugu immikkut timmisartuussinerit ukioq manna timmisartuussinernut sanilliullugit ima isikkoqarput:

• Nuuk-København (nutaatut Kangerlussuarmut aqqusaarneq ilanngullugu): Immikkut timmisartuussinerit 52-it

• Narsarsuaq-København:  Immikkut timmisartuussinerit sisamat

• Nuuk-Billund: Immikkut timmisartuussinerit sisamat

- Albatrosip saniatigut Hurtigruten suleqatigaarput, tamannalu timmisartumik angalasunik amerlanerutitsissaaq, pisortaq oqarpoq, aamma Keflavikimut timmisartuussinerit pillugit Icelandairimik suleqateqarnertik innersuussutigivaa, tassanngaanniillu nunarsuarmut allamut angalasoqarsinnaavoq.

Unammillertit angallassitikkusunngikkaat

Unammillertit allat Nuuk-København-imut timmisartuussisannginnissaat siunertaralugu anguniakkat annertusineqarsimasut nassuerpoq, tamannami Air Greenlandip isertitaanut sunniuteqarsinnaammat.

- Air Greenlandimi timmisartuussisarneq inuiaqatigiinnut iluaqutaavoq. Aamma timmisartortitseqatigiiffiit ilaat angalaffiunerpaami, tassa Danmarkimiit Kalaallit Nunaannut angalasut amerlanerpaaffianni, akikinnerusumik timmisartuussilernissaat soqutigisarinngilarput, timmisartortitseqatigiiffiup pisortaa oqarpoq.

- Europamili timmisartortitseqatigiiffiit allat Nuummut toqqaannartumik timmisartuussisalerusuppata tamanna ajorinngilara, taamaaliornermimi takornariat amerliartussapput nunamilu maani kaaviiaartitsineq annertusissaaq, Jacob Nitter Sørensen nassuiaavoq.

Aalborgimut aqqut kingusinnerusukkut naliliiffigineqassaaq

Ukioq manna Aalborgimit København aqqusaarlugu Kalaallit Nunaannut aasaanerani timmisartuussisoqartalersimavoq.

- Aalborgimut aqqut 2025-mi timmisartuussisarnitsinnut ilaassanersoq suli aalajangersimanngilarput. Tamanna pillugu naliliineq aatsaat ukiaru suliariumaarparput, Jacob Nitter Sørensen oqarpoq.