Air Greenlandip Nuummiit timmisartuussinissat sinneri taamaatippai
Nuup mittarfianit inuit ullumi qimagussorneqarsimalereersullu, mittarfik nal. 16.00 ammaqqinneqarpoq. Taamaattoq Nuummiit aallartussat sinneri taamaatinneqarput. Københavnimut angalasussat nal. 24.00 check-in-eqquneqarput.
Nuup mittarfia pingasunngornermi ualikkut matugallarneqarpoq pasinartumik nassaartoqarnerata kingorna.
Assiliisoq: Oscar Scott Carl
Air Greenland aalajangerpoq ullumi Nuummiit aallartussat sinneri taamaatiinnarniarlugit, Nuup mittarfiani pasinartumik nassaartoqarsimanerani mittarfiup nalunaaquttap akunnerini marlussunni matoqqatitaasariaqarsimanerata kingorna.
Nuummi mittarfimmi isumannaallisaasut immikkoortortaqarfianni nassaartoqareersorlu nalunaaqutaq 14.00 missaani inuit qimagussortinneqarsimapput. Kalaallit Nunaanni Politiit nassaarnermut atatillugu misissuipput, tassanilu mittarfik akunnerni marlussunni matuneqarsimavoq.
Nalunaaqutaq 16.00 timmisartoqarfik ammaqqinneqarpoq, tamannali pingasunngornerup sinnerani Nuummit timmisartunik aallartoqarsinnaaneranik isumaqanngilaq:
- Nal. 16:15 nalunaarutigaarput Nuummiit ullumikkut timminissat tamarmik taamaatinneqartut isumannaallisaanermik suliallit nangillutik misissuissammata sumiiffimmi tamarmi misissuillutik, inuttat timmeqqinnginnerminni qasuersaarnissamut maleruagassat atuuttut malittussaammatigit timmeqqinnginnerminni.
Sisamanngornerup unnuaani timmisartuussisoqassasoq
Air Greenland ilisimatitsivoq utoqqaat, pitsorluttut, napparsimasut, inuit innarluuteqartut ilaqutariillu mikisunik meerartallit unnuiffissanik agguaassinermi salliutinneqartartut.
- Angalasut allat naammagittarnissaannik qinnuigaavut, sapinngisatsinnik sukkanerpaamik ikiorniarneranni. timmisartuutileqatigiiffik taama nalunaarpoq.
Københavniliartussat nassataminnik aalleqquneqarput isumannaallisaasullu ammarpata timmisartumut ikinissamut aallaqqaataaniik check-in-eqquneqarlutik. Check-in unnuap qeqqanut ammarneqassaaq, Københavnimullu timmisartuussilluni aallarnissaq nal. 03.00-imut pilersaarusiorneqarpoq.
- Air Greenlandimit nuanniilliornerit ullormi pisunit peqquteqartut ajuusaarutigaavut, paasinninnissinnut, suleqataanissinnut naammagittarnissinnullu qujalluta, Air Greenland allappoq.
