Air Greenlandip sulisui nutaanik uniformitaartut
Air Greenlandip timmisartortartui, saqisui nassatanillu tigooraasui aasaanera aallarnerfigalugu nutaamik atisartaarput.
Uniformit timmisartumi saqisunit atoruminartuussapput qaleriissillugit atorneqarsinnaallutik, sulinerup nikerarneranut tulluartumik, ukioq qanoq iligaluarpalluunniit.
Assit tamarmik Air Greenlandip assilisai
Sapaatip akunnera manna aallarnerfigalugu Air Greenlandimut ilaasut sulisut allaanerusut takusinnaalissavaat. Air Greenlandimi uniformit taarserpai, 2025-milu aasaaneranut muteerniunerusmik ikaarsaarlutik. Taama timmisartortitseqatigiiffik nammineerluni nalunaarpoq:
– Uniformit nutaat kinaassutsitsinnik takutiinnanngilaat, aammali ilaasutsinnik ilassinninnerput qanoq ittuunersoq takutippaat – takummaanermi, kiffartuussilluarnissamik siunertaqarluta tamatigullu isumannaatsuunissaq qitiutillugu, pisortaaneq Jacob Nitter Sørensen oqarpoq.
Kingullermik uniformit taarsernerannit ukiut 15-t qaangiussimalerput, iluserlu nutaaq sulisut pisortallu suleqatigalugit suliarineqarpoq.
– Pingaartuuvoq uniformip atinerani ilorrisimaarlunilu tulluussimaarnissaq. Nunatsinni timmisartuutileqatigiittut Air Greenlandip avammut kiinnernera kisimi takutinniarneqanngilaq – Kalaallit Nunatsinnut tamarmut takussutissaavoq, Cabin Manager Mette Steenholdt nassuiaavoq.
Air Greenlandip ilisarnaataani toornerit nittaalanik takutitsisut uniforminut ilanngunneqarput.
ILUSILIINERMI NUTAAMI IMMIKKUUALUTTUT PINGAARUTILLIT
- Attasit toorneerartallit - Air Greenlandip ilisarnaataanut innersuussut kusanartoq.
- Qilerniusat qungasequtillu – Studio Tobias suleqatigalugu ilusilersorneqartut marlunnik qalipaatillit: aappaluttumik qasertunik toorneerallit aamma qasertunik aappaluttumik toorneerallit.
- Kjole nutaaq — nutaaliamik isikkulik kalaalerpaluttoq aappalaartunik qalipaatilik.
- Paffequtit – Kalaallit Nunaanni assammik nuersakkat, kalaallisuunit isumassarsiarineqartut issittormiuunitsinnullu tulluartut.
Timmisartup suluata timmisartuussinermik ilisarnaatitut nutaaliorluni ilusilernera, nutaamik ilusiliinerup pingaarutilimmik ilagaa. Ilusissatut missingiussat pingasut timmissanik Kalaallit Nunaannik sakkortuumik ersersitsisumik isumassarsiorluni ineriartortinneqarput. Tassalu tulugaq, imeqqutaalaq nattoralillu. Sulisut nattoralik, portusuumi timmisarnerminik ungasissumullu takunnissinnaasutut ilisimaneqartoq piumaneruaat.
Asaanerani kingusinnerusukkut parka silami atugassiaq atorneqalissaaq.
– Qilanaareqaara, taannalu kalaallimik ingerlatsisumik, silaannarmik inuuffigalugulu najutaqarfigisatsinnik ilisimaarinnilluartoq qanimut suleqatigalugu ineriartortinneqarpoq, taamaalillunilu aasaanerani sulianut, perserluni anorersuarneranullu naleqqussagaalluni, nittarsaassinermut pisortaq Katja Vahl oqarpoq.
