Ajunaalernermi radiukkut aallakaatitsissutit tigummiartakkat pillugit nutaanik malittarisassaqalissasoq
Ajunaalernermi radiukkut aallakaatitsissutip tigummiartakkap atorneqarnissaanut piumasaqaatit periarfissallu pillugit nalunaarut Naalakkersuisut tusarniaassutigaat.
Piniartut pisullutillu angalaartartut sumiiffinni mobilit attaveqaataannik attaveqarfeqanngitsuniittut maannakkut ajunaalernermi radiukkut aallakaatitsissummut kinaassusersiinermut normumik pisinnaalerput.
Kulkturarv.dk
Nalunaarusiap pisoqaanerusup nutarterneqarnerata kingunerisaanik imarsiornermi ajunaalernermi frekvensinik atuisoq PLB (Personal Locator Beacon) nunami atorneqarsinnaanerat akuerineqarpoq. PLB tassaavoq ajunaalernermi radiukkut aallakaatitsissut tigummiartagaq, satellitti aqqutigalugu imarsiornermi ajunaalernermi frekvensinik atuisoq.
- Nunami assersuutigalugu angalaartunit piniartunillu, sumiiffimmi oqarasuaatinut angallattakkanut attaveqanngitsumi, tamannami amerlanertigut illoqarfiit nunaqarfiillu avataanni pisarmat, ikioqqullutik aggeqqusinissamik pisariaqartitsilersunit PLB-t atorneqarsinnaapput, nalunaarut nutartigaq pillugu nassuiaammi allassimavoq.
Suliniut nutaaq naapertorlugu nunami PLB-mi radiup frekvensiisa atorneqarnissaannut kinaassusersiinermut normumik Namminersorlutik Oqartussanut qinnuteqartoqarsinnaalissaaq.
Paasissutissat sukumiisut
Nalunaarummi ilaatigut ima allassimavoq:
- Kinaassusersiinermut tunniunneqarsinnaanngilaq.
- Kinaassusiinermut normu ajunaalernermik kalerrisaarummik aallartitsissagaluarpat, kinaassusiinermut normumik piginnittoq, qinnuteqarnermut atatillugu Kalaallit Nunaanni inuup attaveqarfissap atianik, najugaanik aamma oqarasuaataata normuanik, paasissutissanik amerlanerusunik pissarsiniarlutik annaassiniarnermut oqartussaasut attaveqarfigisinnaasaa, paasissutissiissaaq.
- Paasissutissat imm. 3-mi taaneqartut, qinnuteqaat peqatigalugu Kalaallit Nunaanni Namminersorlutik Oqartussanut nalunaarutigineqassapput, tassani paasissutissat nalunaarsuiffimmut ilineqassallutik.
- Paasissutissani nalunaarsorneqarsimasuni allannguuteqarpat, kinaassusiinermut normumik piginnittup naqqiutit Kalaallit Nunaanni Namminersorlutik Oqartussanut nassiutissavai.
Nalunaarutissatut missingiut ukiut nikinnerini atuutilernissaa pilersaarutaavoq, aamma Kalaallit Nunaanni radiup frekvensiinik atuinermut atasumik akiliutissat pillugit nalunaarummik taarsiinissaa siunnersuutigineqarpoq.
Allannguutit tamarmiusut aamma akitsuutit nutaat uani takukkit.
Tusarniaanermut piffissaliussaq tassaavoq novembarip 25-at.
