Ajutoornikkut ajunaarsimasorinninneq kiisalu nuna tamakkerlugu sapaatip akunnerata naanera eqqissiviilliorfiusoq

Kalaallit Nunaanni Politiit arfininngornermi ullaakkut aggustip 31-ani 2024-mi aallartittumik Kujataani ujaasipput angummik  37-nik ukiulimmik, tallimanngornermi ualikkut Narsarsuarmiit Qassiarsummut qajartorluni aallarsimasumik. Angut pineqartoq kalaaliuvoq nunatsinnilu najugaqartuulluni.

Taamaattumik Politiit annertunerusumik ujaasilerput Issittumi Sakkutuut aammalu Qassiarsummiut Narsarsuarmiullu kajumissutsiminnik ujaaseqataasut peqatigalugit. Aammattaaq politiit angallataat Nukik Qaqortumit ujaasiffimmukartinneqarpoq.

Qassiarsuup Narsarsuullu eqqaanni kangerluk sineriak imartarlu misissorneqarput silaannakkut Air Greenlandip qulimiguulimmik aamma imaatigut, kajumissutsiminnik ujaaseqataasunit aammalu politiit angallataat Nukik atorlugu.

Ujaasinerup nalaani angutip qajaa Narsarsuup kitaani imarmi nassaarineqarpoq aamma maqaasineqartup qajaa atortuilu nassaarineqarput, kisianni 37-nik ukiulik nassaarineqanngilaq.

Oqartussaasut innuttaasullu sumiiffimmi isorartuumi annertuumik ujaasisimapput, kisianni 37-nik ukiulik angut nassaarineqanngitsoorpoq, taamaattumillu ujaasineq unitsinneqarpoq, maannakkut takussaasunik malunnartoqanngimmat misissuiffigineqarsinnaasunik.

Qajaa atortuilu nassaarineqarput mobilikkullu attaveqarnera misissorneqarluni

- Atortui nassaarisimavavut aamma mobiltelefonimini attaveqarsimanera  misissuiffigivarput, qanga kingullermik attaveqaatinik atuisimanersoq takusinnaavarput, taamaalilluta sumerpiaq qangarpiarlu ajutoorneq ajunaarsimanissaanik ilimatsaassinertalik nalilerluarsinnaavarput. Sumiiffik imaatigut silaannakkullu misissuiffigeqqissaarneqarpoq, arlaleriarluni timmisartumik qulaavaanerit angallammillu zigzag-imik ingerlaarnerit kingorna, nassaarineqarsinnaanngimmat ujaasineq unitsiinnartariaqarsimavarput, vagtchefi oqaluttuarpoq.

Politiit nakkutilliisuutitaasa pisortaat Andreas Nordentoft ujaasinermi ikiuussimasunut, pingaartumillu kajumissutsiminnik ujaaseqataasimasunut qujavoq nersualaarinnillunilu.

Tassunga tapiliullugu politiit nakkutilliisuutitaasa pisortaat erseqqissaavoq imaatigut angalatilluni, inuup timaanik puttasumik ujaarineqartuusimasinnaasumillu nassaartoqassagaluarpat, taava Kalaallit Nunaanni Politiit 701448-mut attavigineqassasut.

Nuna tamakkerlugu nalinginnarmit annertunerujussuarmik ulappupput

- Nalunngereerparput sapaatip akunnerata naanera manna assut ulapaarfiusussaasoq, taamaammallu aamma nalinginnaasumit illoqarfinni anginerni politiit amerlanerusut sulisinneqarput, taamak Sermitsiamut oqaluttuarpoq Kalaallit Nunaanni Politiit nakkutilliisuutitaasa pisortaat, Andreas Nordentoft.

- Inoqatinik navianartorsiortitsilluni pilerlunnerit arlallit nuna tamakkerlugu pisimapput, maannamullu ilisimasavut naapertorlugit inunnik inuunerminnik navianartorsiortoqanngilaq, naak inuunerminnik navianartorsiortinneqarlutik pinerluffigitissimagaluarlutik.

Nuummi savimmik kapisisoqarsimavoq aammalu sakkulerluni nakuuserluni saassussisoqarsimalluni. Andreas Nordentoft oqaluttuarpoq suliat matumani pineqartut marluk maannakkut misissuiffigineqartut, inullu sakkulerluni inoqamminut saassussisimasoq tigusarineqarsimavoq savimmilli kapisisimasoq suli kinaassusersineqarsimanngilaq, taamaalillunilu suli tigusarineqarsimanani.

Sisimiuni Uummannamilu kinguaassiutitigut kanngutsaatsuliortoqarsimasinnaaneranik politiit aamma suliaqarput, suliat pineqartut maanna politiinit politiillu inatsisilerituuinit misissorneqarpoq eqqartuussivimmut sassartitsisoqassanersoq, misissuinerillu ingerlammata sukumiinerusumik oqaaseqarfigineqarsinnaanngillat.

Pisimasut tigussaasut matumani taaneqartut saniatigut eqqissiviilliornerpassuit politiit orniguffigisariaqarsimavaat, ataatsimut oqaatigalugu taakku tamarmik aalakoornartumik imigassartorsimanermut attuumassuteqarput.