Akerliussutsimik takutitsineq: - Persuttaaneq akuerinngilarput
Sisimiuni GUX-imi ilinniartoq 16-inik ukiulik nakuuserfigineqangaatsiareernerata kingorna Sisimiuni innuttaasut marluk Lena Reimer aamma Navaranaaq O. Larsen nipaatsumik akerliussutsimik takutitsinissamik suliniuteqarsimapput.
Sisimiuni innuttaasut persuttaanermik akuersisuunnginnertik ullumi takutinniarpaat.
Foto: Tôrtia Reimer-Johansen
Sisimiuni innuttaasut nipaatsumik akerliussutsimik takutitsisut ullumi tallimanngornermi nalunaaqutaq 16.30-mit illoqarfimmi takussaassapput.
Nipaatsumik akerliussutsimik takutitsineq arnanit marlunnit aaqqissuunneqarpoq. Lena Reimer aamma Navaranaaq Olsen illoqarfimmi sakkortuumik persuttaasoqarsimaneranut sunnerteqqapput.
Nukappiararmi inuusuttoq GUX-imi ilinniartoq persuttarneqarnermi kingorna ajoqusersimanini pillugit maanna Danmarkimi Rigshospitalimi suliarineqarpoq. Pisoq Sisimiuni illoqarfimmi oqallitsitsivoq, toqqissisimanerlu anguniarneqarluni iliuuseqartoqarnialerpoq.
- Persuttaaneq akuerinngilarput
Akerliussutsimik takutitsinissaq ima qulequtaqarpoq: Persuttaaneq akuerinngilarput.
Lena Reimer aamma Navaranaaq O. Larsen ima nassuiaapput:
- Issiaannarsinnaanngilagut eqqarsarluta "ingasak" iliuuseqaratalu. Inuiaqatigiittut takutittariaqarparput persuttaaneq akuerinagu, Lena Reimer Sermitsiamut oqarpoq nangillunilu:
- Siorna juullinngitsiartoq aamma taama pisoqarpoq, tassani aamma angut inuusuttoq sakkortuumik persuttarneqarpoq Rigshospitaliliaanneqarlunilu. Taamatut pisoqartuaannarsinnaanngilaq.
Navaranaaq O. Larsen ilaliivoq:
- Maani illoqarfimmi persuttaasartut taakku amerlanngillat, takutittariaqarparput Sisimiuni amerlanerussuteqartut persuttaanermik akuersisuunngillat.
Sisimiut ilinniartoqarfiummat illoqarfimmi innuttaasut illoqarfiup toqqissisimanartuunissaa kissaatigaat, ingammik ilinniartut illoqarfimmi unnukkut toqqissisimallutik nuannisarsinnaasariaqartut.
- Ikinngutit ilagalugit unnussiuaarluni nuannersuuvoq, inuusuttut aamma tamanna illoqarfimmi toqqissisimallutik misigisinnaasariaqarpaat, Lena Reimer oqarpoq.
Borgmesterimit tapersersorneqartut
Akerliussutsimik takutitsinissamut aaqqissuussisut oqaluttuaraat Facebookikkut takusinnaallugu illoqarfimmit tapersersorneqarlutik.
- Amerlasuut allapput pisoqataaniarlutik, aamma borgmesteri skiltilersuiffissanik ikiuunniarpoq, Lena Reimer oqarpoq.
Nipaatsumik akerliussutsimik takutitsineq Akikimit nalunaaqutaq 16.30 aallartissaaq.
