Akerliussutsimik takutitsisut: - Pinngitsaaliissummik arsaarinninnermik suliaq avaanngusunnangaarpoq
Danmarkimi angajoqqaatut piginnaasanik misissuinnittarnerit akerleriissutaasut pillugit kiisalu kalaaliaqqap pinngitsaaliissummik arsaarneqarneranut akerliussutsimik takutitsinermut Nuummiut arlallit arfininngormat peqataapput.
Ulluni makkunani Danmarkimi pinngitsaaliissummik arsaarinninneq pillugu suliaq oqallisaangaarpoq.
- Anaanaasoq kinaluunniit avaanngusunnani suliami malinnaanngitsoorsimanissaa ilimaginngilara, Aka Hansen oqarpoq, taannalu arfininngormat Nuummi tapersersuilluni akerliussutsimik takutitsinermik aaqqissuussisunut ilaavoq.
Suliaq Kiera Alexandra Kronvoldimut tunngavoq, taassumalu meeraa inunngormat pinngitsaaliissummik arsaarinnissutaavoq, tamannalu danskit oqartussaasuisa naliliinerisigut pivoq.
Angajoqqaatut piginnaasanik misissuiffiginnittarnerit (FKU) Danmarkimi kommunit ilaannit atorneqartartut, aammalu qallunaat kalaallillu kulturikkut assigiinngissutaannik eqqarsaatiginninnginnerarlugit isornartorsiorneqartut, suliap massuma sammineqaqqilersippai.
Aka Hansen: Amerlasuut sunnerneqarlutillu aliasupput
Arfininngormat Københavnimi akerliussutsimik takutitsisoqarpoq, Nuummilu politikkerit iliuuseqaqqullugit minnerunngitsumillu angajoqqaatut misilitsinnerit akerleriissutaasut atorunnaarsinniarlugit tapersersuilluni akerliussutsimik takutitsisoqarpoq.
Arfininngornermi ullaap tungaani akerliussutsimik takutitsisut amerlangaarnerat Aka Hansenip tupaallaatiginngilaa:
- Tupaallaatiginngilluinnarpara, inuppassuimmi sunnerneqarsimasut aliasuttullu attaveqarfigisarpakka. Pissutsit qanoq ingerlanneqarnersut pillugu naammaginninnginnerujussuaqarpoq, Aka Hansen Sermitsiamut oqarpoq.
Akerliussutsimik takutitsisut Inatsisartunut ingerlaqqipput, tassanilu politikkerit arlallit isummerput.
Naalakkersuisoq: Ingasallunilu isumakulunnarpoq
Naalakkersuisoq Aqqaluaq B. Egede (IA) aamma tallimanngornermi suliaq pillugu tusagassiuutinut nalunaaruteqarpoq.
Danmarkimi kommunit, kalaallit kulturikkut oqaatsitigullu paasinnittariaasiat eqqarsaatiginagu, suli angajoqqaatut piginnaasanik silassorissutsimillu misissuisarnerat tassani ernumanartorujussuunerarpaa:
- Misissuinerit kalaallit innuttaasuinut naleqqussarneqarsimanngitsut ingerlanneqaraangata, ullumikkumut ilaqutariit kalaallit inuit pisinnaatitaaffiinit suli illersorneqartannginnerat ingasallunilu isumakulunnarpoq.
- Ilaqutariinnut kalaallinut toqqissisimananngitsupilussuuvoq. Kalaallit innuttaasut naalagaaffeqatigiinnermi naligiittut innuttaasuupput taamaammallu ilaqutariinni kalaallini angajoqqaatut piginnaasanik nalilersuinermi kalaallit kulturiat oqaasiilu ilanngunneqarnissaat pingaaruteqarpoq, Aqqaluaq B. Egede nalunaarummi taama oqaaseqarpoq.
Arlaannik susoqanngippat akerliussutsimik takutitseqqinniartut
Angajoqqaat kalaallit angajoqqaatut piginnaasaannik misissuiffigineqartarnerannut, tarnip pissusaanik ilisimasallit kalaallit aamma sulisut isumaginninnerup iluani ilinniagaqarsimasut Danmarkimi kalaallit illuinut atassutillit, atorneqartalernissaannut aallartitsinissamik, danskit oqartussaasui suliamut iliuuseqaqqullugit Naalakkersuisunit kaammattorneqarmata januaarimi ukiut marlunngussasut, Naalakkersuisoq oqarpoq.
Aka Hansen arfininngornermi akerliussutsimik takutitsinermik aaqqissuisut ilaat oqarpoq suliassaqarfik nakkutigilluarneqassasoq isumaqatigiissutaasoq:
- Arlaannik pisoqanngippat akerliussutsimik takutitseqqikkumaarluta isumaqatigiissutigaarput. Naatsorsuutigaarput oqaatsiminnik eqqortitsissasut, Aka Hansen oqarpoq.
