Aki-Matilda Høegh-Dam Folketingimiit sulinngiffeqarnissamik qinnuteqaqqittoq
Kalaallit folketingimut ilaasortaata Inatsisartut ukiaanerani ataatsimiinnerat ukkatariniaraa, Altinget allappoq.
Aki-Matilda Høegh-Dam peqataanngilaq folketingimi ammaanersiornernut ukioq manna. Taanna folketingimiit sulinngiffeqarniarluni qinnuteqarpoq. (Arktikfoto).
Assi: Trine Juncher Jørgensen
Naleraq sinnerlugu Folketingimut ilaasortaq Aki-Matilda Høegh-Dam Folketingimiit sulinngiffeqarumalluni qinnuteqartoq, Altinget allappoq.
- Inatsisartut ataatsimiilerput, ataatsimiinnermullu nukissakka sipaarusuppakka, Aki-Matilda Høegh-Dam Altinget-imut oqarpoq.
Inatsisartut ukiaanerani ataatsimiilernerat septembarip 19-ianni aallartippat sulinngiffeqarneq allartissasoq Altinget allappoq. Sulinngiffeqarnerlu novembarip 14-iani tungaanut atuutissasoq qinnutigineqarpoq.
Taamaattumik Folketingi oktobarip aallartinnerani ammaanersiorpat peqataanavianngilaq.
Folketingi marlunngornermi oktobarip arfineq-aappaanni ammaanersoreerpat ullut marluk qaangiuppata ammaanersiornermi oqallinneq allartissaaq.
Inatsisartunut qinigaasoq
Aki-Matilda Høegh-Dam 2023-mi Siumut sinnerlugu ilaasortaagallarami, Folketingip ammaanersiorneranut aamma peqataanngilaq. USA-mut taamani pikkorissariaqqanera pissutaavoq.
SINNIISUT
Aki-Matilda Høegh-Dam Folketingimut 2022-mi qinersinermi 6.670-init taaguunneqarpoq.
Kina sinniisutut taartaassanersoq suli ilisimatitsissutigineqanngilaq, sinniisussatulli qinikkat ukuupput:
Markus E. Olsen (329-nit qinerneqartoq)
Karina Zeeb (179-init qinerneqartoq)
Elvira Kûitse (120-nit qinerneqartoq)
Aki-Matilda Høegh-Dam namminiilivinnissamik anguniagaqartumut Naleqqami ilaasortanngoqqammerluni Inatsisartunut marsimi qinigaavoq.
Taamanimiilli Inatsisartuni Folketingimilu ilaasortaalerpoq, marloqiusamillu ilaasortaaffeqarnera isornartorsiorneqartarluni. Aamma marlunni akissarsiaqarnera pissutigalugu.
Kalaallit Nunaannit marsimi qinersisoqareermat Aki-Matilda Høegh-Dam "ukiup ingerlanerani“ Folketingimi ilaasortaajunnaarniarluni oqarpoq.
- Inatsisit aallartitama ilaat naammassineqarnissaat qulakkeerniarpara. Taamaanngippat ikaarsaarneq arriitsumik ingerlatissavarput, DR-imut taamani oqarpoq.
Taamaakkaluartoq Folketingimi 2019-imi ilaasortaaffigilikkami ilaasortaaginnarpoq.
Isummamik allanngortitsisimannginneratoq
Aki-Matilda Høegh-Damip isummani allanngortissimannginnerarpaa.
- Sulinngiffeqarnissara pilersaarutigiuaannarnikuuara. Tusagassiuutinullu taama oqarsimanera eqqaamavara, Altingetimut oqarpoq.
Folketingimut qinersinissamut sassaqqissanerluni suli aalajangersimanngitsoq tusagassiorfik allappoq. Aappaagu oktobarip naannginnerani qinersisoqassaaq.
Aki-Matilda Høegh-Damip Folketingimi kalaallisut oqalunnissamik kimigiiserluni piumasaqarnera ilaatigut maluginiarneqarnikuuvoq.
Tamanna pissutigalugu Folketingimi oqalutseqarsinnaanissamik aaqqissuussaq periarfissaalernikuuvoq.
/ritzau/
