Aki-Matilda Høegh-Dam: – Naleqqami angerlarsimasutut misigivunga
Folketingimut ilaasortaq Aki-Matilda Høegh-Dam Naleqqami ilaasortanngorpoq, Inatsisartunullu qinigassanngortilluni. Tamanna Sermitsiamit apersorneqarnermini uppernarsarpaa. Sivisuumik eqqarsareerluni partiimi angerlarsimasutut misigiffigisinnaasaminik nassaarpoq, aalajangerlunilu partiimi ilaasortanngorusulluni.
Aki-Matilda Høegh-Dam misigisimavoq Naleqqamut tikilluaqqusaalluarluni. Siumumi ukiuni arlalinni ilaasortaareerluni tunuarpoq weekendilu atorlugu eqqarsaatigeqqissaarpai politikkikkut alloriarnissani tulliit.
Assi: Leiff Josefsen
- Partiip allaffianut iserama misigisimavunga sivisuumik maqaasisimasara soorlu tikeqqillugu. Soorlu angerlarluni, Aki-Matilda Høegh-Dam, Siumumiit Naleqqami ilaasortanngorlaaq, oqaluttuarpoq.
- Misigissuseq maqaasisimasara tammarsimanngilaq. Suli Naleqqamiippoq. Taamaattumik qularunnaarlunga ilaasortanngorniarlunga nalunaarpunga.
Folketingimut ilaasortap Naleqqami ilaasortanngornini nalunaarutiginerata saniatigut Inatsisartunut qinersinissami qinigassanngortinnini nalunaarutigaa. Taanna oqaluttuarpoq Nalrraq tunuliaqutaralugu nunatta namminiilivinnissaa sulissutigiumallugu.
2025-mi marsip aqqarnani Inatsisartunut qinersisoqassaaq.
Folketingimi kisimiittutut misigineq
Aki-Matilda Høegh-Dam, Siumut sinnerlugu Folketingimi ilaasortaasimasup, siornatigut kiserliortutut sulinerminilu tapersersorneqanngitsutullu misigisarsimavoq.
- Kisimiittutut tapersersorneqanngitsutullu misigigaluarlunga angusarpassuaqarpunga. Maanna kisimiittutut misigiunnaarama tapersersorneqartutullu misigilerama ila suummita angusinnaavakka, Sermitsiamut oqarpoq.
Partiimut allamut nuukkaluarluni politikkikkut anguniakkani aalajangiusimajuarpaa: Kalaallit Nunaata naalagaaffinngortinneqarnissaa sulissutiginiarlugu nunanullu allanut takutinniarlugu Kalaallit Nunaat imminut akisussaaffigilersinnaasoq.
Aki-Matilda Høegh-Damip Folketingimi ilaasortaajunnaarnissani pilersaarutiginngilaa.
- Isumaginninnermut tunngasut iluanni siunnersuutiga februaarip 28-ani siullermeerneqassaaq, suliaralu naammassiumavara, oqarpoq.
2026-mi Folketingimut qinersisoqassaaq.
