Folketingimi sisamanngornermi pissanganartorsiulaartoqarpoq, tassanimi qallunaat silap pissusianut ministeriat Lars Aagaardip uppisinneqarnissaralua taasinermi ataasiinnarmik amerlanerussuteqartunit annaanneqarpoq.
Atlantikup avannaani ilaasortanit sisamaasunit pingasut ministeri annaappaat, Aki-Matilda Høegh-Damilu (N) taaseqataanani.
Folketingimi sisamanngornermi pissanganartorsiulaartoqarpoq, tassanimi qallunaat silap pissusianut ministeriat Lars Aagaardip uppisinneqarnissaralua taasinermi ataasiinnarmik amerlanerussuteqartunit annaanneqarpoq.
Atlantikup avannaani ilaasortanit sisamaasunit pingasut ministeri annaappaat, Aki-Matilda Høegh-Damilu (N) taaseqataanani.
Sooq taaseqataannginnini Sermitsiamut maanna nassuiarpaa. Kalaallit Nunaannut attuumassuteqanngitsunut tunngatillugu taaseqataasannginninni allanngortissaguniuk, tamassuma kalaallinut qanoq iluaqutaasinnaanerata isumaqatiginninniutiginnissaa naatsorsuutigaa.
- Toqqarlunga oqaloqatigeqqaarnanga ilaasortat pingasut assigalugit tapersiillunga taaseqataaginnarnissara paatsoorneqarsimavoq.
- Nuannarinngilara. Partiimit allameersuullungalu inuk allaavunga. Pisut ataasiaakkaat immikkut nalilersortarpakka, Aki-Matilda Høegh-Dam oqarpoq.
- Politikkikkut anguniakkat eqqarsaatigalugit qanoq tapersersoqatigiissinnaaneq pisuni tamani politikerit tamarmik isumaqatiginninniutiginissaat pingaaruteqarpoq. Danskinut tunngasuni taasinissaq tapersersorsinnaavara, Folketingimi Kalaallit Nunaannut sunniuteqarujussuartarmat – kisianni kalaallinut iluaqutaasinnaanersoq aalajangiiffiginissaa pingaaruteqarpoq.
Folketingimut paasissutissat
Innaallagissamik pilersuinerup kinguaattoornera pillugu Lars Aagaardip Folketingimut paasissutissiisimannginnera aaqqiagiinngissutaalerpoq.
Aki-Matilda Høegh-Damip pisoq ilungersunartutut isigaa. Danskit naalakkersuisuinut tapertaagaluarluni suliamiit suliamut naliliisarnissani aalajangiusimavaa.
- Danmarkimut tunngasunut taasinngitsoornissamut najoqqutassiaq allanngortinneqassappat oqaloqatigiissutigeqqaarnissaa pisariaqartippara, oqarpoq nangilluni:
- Politikki isumaqatiginninniutaajuaannarpoq, kalaallillu soqutigisaat aalluttuartussaavakka. Pisoq aalajangersimasoq isumaqatiginninniutiginissaa naatsorsuutigaara, nuannarinngilaralu isumaqatiginninniarfigineqarnanga tapersiillunga taaseqataasinnaasutut isigineqarnera.
Tapersiinani taaseqataasimasinnaasoq
- Nalunngilara Folketingimi partiit allat tamarmik isumaqatiginninniarfigineqarsimanissaat. Politikkikkut anguniagaqarnitsinni qanoq tapersersoqatigiissinnaaneq oqaloqatigiissutigalugu.
Aki-Matilda Høegh-Damip danskit naalakkersuisui suli tapersersorlugillu erseqqissarpaa, unalu pisoq naalakkersuisunut tamarmuunngitsoq ministerimut ataatsimut tunngassuteqartuusoq.
Tapersersuinini ersersinniarlugu taaseqataannginnini aamma erseqqissaatigaa, tassami illuatungiliuttut ministerimik uppisitsiniarnerat tapersersimasinnaagaluaramigit.
