Aki-Matilda: Naalagaaffinngornissamut naalakkersuisoqarfik naak?

Naalakkersuisut nuaat naalagaaffinngornissamut naalakkersuisoqarfik qanoq pigamikku?

Tamanna Inatsisartunut ilaasortap Aki-Matilda Høegh-Damip (N), allakkatigut Naalakkersuisunut apeqquteqarnermini akeqquaa.

Naalakkersuisooqatigiit nutaat “Naalagaaffinngornissamut Naalakkersuisoqarfik” peersimanerat paaserusuppaa:

- Naalakkersuisoqarfiup taaguutaannaa imaluunniit Naalakkersuisoqarfik tamakkerlugu atorfeerussarneqarsimanersoq innuttaasut paasisariaqarmassuk apeqqutit ingerlateqqinneqarput, Aki-Matilda Høegh-Dam (N) apeqquteqaatiminut tunngavilersuutigisamini allappoq.

Naalagaaffinngornissamut akisussaaffeqarfik “Tunngaviusumik inatsiseqalernissamut” immikkoortortaqarfinngortinneqartoq, Naalakkersuisut Siulittaasuat Jens-Frederik Nielsen (D) ilisimatitsivoq.

Naalakkersuisunillu pilersitsinermut atatillugu immikkoortoq Naalakkersuisut siulittaasuata oqartussaaffianut nuunneqarpoq, taamaalillunilu Naalakkersuisut Siulittaasuata Naalakkersuisoqarfianiilerluni.

Namminiilivinnissaq pingaarnerutinneqassava?

Naalakkersuisut siuliini oqartussaaffeqarfik Nunanut allanut Naalagaaffinngornissamullu Naalakkersuisoqarfiup ataanut inissinneqarpoq.

Naalakkersuisut Siulittaasuata taaguutaa oqartussaaffiit apeqqutaatinnagit taamaaginartinneqartoq, taamaammallu naalagaaffinngornissaq tunngaviusumilluunniit inatsiseqalernissamut immikkoortoq nutaaq naalakkersuisup naalakkersuisoqarfiulluunniit taaguutaanut ilaatinneqanngitsoq, ilanngullugu nassuiaatigineqarpoq.

Oqartussaaffeqarfik pingaarnerutinneqassanersoq ilanngullugu Aki-Matilda Høegh-Dam Naalakkersuisunut aperivoq. Tunngaviusumik inatsiseqalernissamut Immikkoortumut isumalluutit ilaneqarnissaat Naalakkersuisut ingerlaavartumik nalilersortuaraat, Jens-Frederik Nielsenip apeqqummut akissutigaa.

Ilanngullugu oqartussaaffimmik nuussineq Jens-Frederik Nielsenip pingaarnerutitsinertut isigaa.