Aki-Matildap folketingimi suleqatini maalaarutigaa
Rasmus Jarlov Konservativeneersoq Folketingip siulittaasoqarfianut Folketingimut ilaasortap Aki-Matilda Høegh-Damip maalaarutigaa
Rasmus Jarlov pillugu maalaaruteqarniarluni Aki-Matilda Høegh-Dam aalajangerpoq.
Toqqorsivimmit assiliisoq: Leiff Josefsen
Aki-Matilda Høegh-Damip Folketingip Siulittaasoqarfianut maalaaruteqarnermini Rasmus Jarlovip assigiinngisitsisutut nikanarsartulluullu imminerminut oqaaseqarfiginnissimanera oqaluttuaraa.
- Naak oqaatsit kalaallisut ilitsoqqussaralugillu qallunaatut meeraanermini ilinniarsimalluni Aki-Matilda Høegh-Damip erseqqissumik oqaatigisimagaluaraa taamatut oqaaseqartoqarpoq, Siumut Folketingimi tusagassiuutinut nalunaarummi allappoq.
Qallunaatut
inuiaassutsikkut tunuliaqutaqarnissaanik Rasmus Jarlov piumasaqarniarsarisoq, kiisalu kalaaliunera akuersaanngikkaa politikkeri oqarpoq.
Ilaqutai pillugit oqaaseqartoq
- Folketingimut
ilaasortat allat kinaassusiannik, inuiaassusaannik kiisalu kulturimik
tunuliaqutaannik sakkortuumik akerliliisumik folketingimi ilaasortaasut maani
issiasut oqalugiartalernissaat siulittaasoqarfiup akuerinavianngikkaa
naatsorsuutigilluinnarpara, Aki-Matilda Høegh-Dam oqarpoq.
Folketingimi pingasunngormat naggataarutaasumik oqallinnermi Rasmus Jarlov taama oqaaseqarpoq.
Rasmus Jarlovip oqaaseqaatai Aki-Matilda Høegh-Damip naammagittaalliutigisai imaapput:
„Siorna aasakkut Kalaallit Nunaanniikkama nunnaarutigeqisannik Fru Damip ilaqutai naapippakka. Ilaqutariit tamarmik Nuummi katersortarfimmi uannut apersuiartornerini oqaloqatigilluaqattaarpakka, taamaammat ilaqutariit taakku qallunaajulluinnartut nalunngilara.“
Pissusissanik malinnilluarnissamik piumasaqartoqarnissaa kissaatigigaa
- Naak oqaatsit kalaallisut ilitsoqqussaralugillu qallunaatut arfinilinnik-arfineq-marlunnik ukioqarlunga ilinniarsimallunga oqallinnermi erseqqissumik oqarsimagaluartunga taama oqaaseqarpoq, Aki-Matilda Høegh-Dam Folketingip Siulittaasoqarfianut maalaaruteqarnermini allappoq.
Pisimasup misissorneqarnissaa, Rasmus Jarlovip pissusissanik malinnilluarnissaanik piumasaqartoqarnissaa kiisalu Folketingimi ilaasortat kulturikkut oqaatsitigullu tunuliaqutaannik ataqqinninnissamik malittarisassaliortoqarnissaa, siulittaasoqarfimmut kaammattuutigaa.
Rasmus Jarlov oqaaseqartinniarlugu Sermitsiap sulissutigaa.
