Aki-Matildap oqalugiaataa akerleriissutaasoq: Inatsisitigut isumannaatsuunerup assigiinngissutai ajornartorsiutaangaarput
Folketingimut ilaasortap Aki-Matilda Høegh-Damip ammaanersiorluni oqalugiarnermini – kalaallisut – naalagaaffeqatigiinni inatsisitigut isumannaatsuuneq assigiinngissuteqarpallaartoq oqaatigaa.
Aki-Matilda Høegh-Dam Folketingimi ammaanersiorluni oqalugiarnermini oqarpoq inatsisitigut isumannaatsuuneq Danmarkimisut pitsaatigilersinniarlugu Kalaallit Nunaanni pitsanngoriaateqangaartariaqartoq. Aki-Matilda Høegh-Damip Folketingimi ammaanersiorluni oqalugiarnermini tamanna oqaatigaa.
Liselotte Sabroe / Ritzau Scanpix
Sisamanngormat unnukkut Folketingimi tupaallannartumik pisoqarpoq Aki-Matilda Høegh-Dam (S) oqaluttarfimmit kalaallisuinnaq oqalugiarmat.
Politikeri siumut nalunaarsimavoq qallunaatut oqalugiarnermigut marloriaammik suliaqarnaviarani.
Oqalugiaataa nutserneqarnikuulluni Folketingimi ilaasortanut tunioraanneqarnikuuvoq. Oqalugiaalli kalaallisut oqalugiaatigineqarmat Folketingimi Siulittaasoqarfik aalajangersimavoq Folketingimi ilaasortat politikeri apeqquteqarfigisinnaanngikkaat.
Inatsisitigut isumannaatsuuneq ajornartorsiorfiuvoq
Kalaallit inatsisitigut isumannaatsuunerat naalagaaffeqatigiinnerup sinneranut naleqqiullugu sanngiippallaartoq oqalugiaammi pingaarnertut sammineqarpoq.
Aki-Matilda Høegh-Damip tamanna uppernarsarniarlugu oqaluttuarisaanermi pisimasunik arlalinnik assersuussivoq:
- Inatsisitigut ataataqanngitsut, arnat spiralilersuinermi eqqugaasut, meeqqat pinngitsaalillugit qitornavissianngortinneqartut meeqqallu misileraataasimasut illersorneqarsimanngillat. Inatsisitigut illersorneqanngillat, Aki-Matilda Høegh-Dam oqarpoq.
Angutit qallunaat arnanik kalaallinik meerartaarfeqartut, nakorsat arnanut naartunaveersaatilersuisut angajoqqaarsiallu kalaallinik meerarsiartaartut inatsisitigut illersorneqartut ilanngullugu tikkuarpaa.
- Assigiinngissut tassaavoq illersorneqanngitsut tassaammata kalaallit. Inuit. Illersorneqartullu tassaapput qallunaat. Assigiinngissutit ajornartorsiutaasariaqanngillat. Inatsisilli assigiinngitsunik isumannaassuseqarpata ajornartorsiutaalissapput. Kinaluunniit assigiimmik inatsisiliorfigineqartanngippat tamanna ajornartorsiutaalissaaq, Aki-Matilda Høegh-Dam oqarpoq.
Ajornartorsiutit suli angingaartut
Eqqartuussissuserisut siunnersuisoqatigiivisa misissuisitsinerisa takutippaat Kalaallit Nunaanni inatsisitigut isumannaatsuuneq naammaginartumik qaffassappat ukiumut 34 millionit koruunit naalagaaffimmit aningaasaliissutigineqartut saniatigut pisariaqartinneqartut.
Folketingimut ilaasortap erseqqissarpaa inatsisitigut isumannaatsuunermut tunngatillugu suli suliniutit arlallit suli suliarineqartariaqartut.
- Kalaaleq eqqartuussivimmi suliamik suliarinninnissamut pineqaatissiissutissaqartinneqarnaviarnani ukiuni tallimani utaqqissanngilaq. Taama sivisutigisumik utaqqineq inummut inuttut kingunerlutsitsisarpoq.
- Kalaallit Nunaanni politiit, eqqartuussisut inatsisilerituullu atugaat suli pitsanngorsarneqartariaqarput, Aki-Matilda Høegh-Dam oqarpoq.
Aki-Matilda Høegh-Damip erseqqissarpaa assigiinngissuteqarneq ajortuusariaqanngikkaluartoq, assigiinngissuteqarnerli pissutigalugu assigiinnik atugassaqarnissamut periarfissaqanngitsoq.
Søren Gade: Akip ilisimareerpaa
Aki-Matilda Høegh oqalugiareermat Folketingimi siulittaasup Søren Gadep oqaluttarfimmit ammukartippaa, taassumami apeqquteqartoqaqqusaannginneq pimooruppaa.
- Oqalugiaat qallunaatut oqalugiaatiginngikkaanni oqallisigineqarsinnaanngilaq, tassami fjernsynikkut malinnaasunut Folketingimiittunullu paasiuminartuussaammat. Tamannalu Akip ilisimareerpaa, 2023-mi novembarimi Akip apeqqutaanut tamanna akissutigaara, Søren Gade akerleriinneq pillugu DR.dk-mut oqarpoq.
