Akiitsut annertuallaartut nassuerutigaat

Royal Greenland Kalaallit Nunaanni inuiaqatigiinni immikkut inissisimavoq. Ingerlatseqatigiiffik sinneqartoorutinit aammalu ingerlatseqatigiiffiup akileraarutaanik nunatta karsianut tunniussiinnartussaanngilaq, aammali sinerissami tunitsivinnik, tunisassiorfinnik suliffissuarnillu ammatitsinissaminik pisussaaffeqarpoq.

Aalisarnermut inatsisissatut siunnersuummi ingerlatseqatigiiffimmut atugassarititaasut allanngortinneqassanngitsut siunniunneqarsimavoq, tassani pissutaatinneqarluni ingerlatseqatigiiffiup inuiaqatigiinnut tunitsivissanik nunamilu suliffissanik ingerlatsinissaminut pisussaaffeqarnera.

Pingaartumik Inatsisartuni illuatungiliuttut sakkortusaarput piumasaralugulu Royal Greenland namminersortunit allaanerusumik pineqassanngitsoq. Naalakkersuisut aalisarnermut inatsisissatut siunnersuutaat Inatsisartunit suliarineqareerluni naammassineqarpat ataatsimiititaliamilu suliarineqareerluni isumaliutissiissummik tunniussisoqarpat paasinarsissaaq oqimaaqatigiissaakkamik aalisarnermik inatsimmik kinguneqarumaarnersoq.

Kisianni Royal Greenlandip 3 milliardit koruunit missaannik akiitsoqarnera pissutigalugu, partiit ilaasa aarleqqutiginerartarpaat, nunap aningaasaqarnera qajannarsisinneqarsimasoq.

Sermitsiap nittartakkatigut nutaarsiassaqartitsivianit Royal Greenland ingerlatseqatigiiffiup akiitsui pillugit nammineq oqaasertaleeqquarput.

- Aap, akiitsut amerlavallaarujussuartut

Taama oqarpoq pisortap tullersortaa Nils Duus Kinnerup akerleriissuteqarani. Nassuiaavoq suliffeqarfik akiitsunik ikilisaaniarnermik sakkortuumik suliaqartoq, aamma neriuutigineqarpoq akiitsut ukiuni tulliuttuni pingasuniit sisamaniit suliffeqarfiup siulersuisuisa kissaatigisamut appartinneqassasut:

- Akiitsugut amerlavallaarujussuartut, tamanna pillugu isumaqatigiinngilagut. Kisianni akiitsut tunngavigisaat tassaavoq, 2 milliardit koruuninik nutaanik umiarsualiornerput. Umiarsuit taarserneqarnerat aallartippat 2017-imi nalunngilarput ukiuni arlalinni akiitsunik qaffakkiartornermik kinguneqartussaasoq.

- Kisianni akerleriissuteqarani, tassaavoq Royal Greenlandimut aamma minnerunngitsumik Kalaallit Nunaannut aningaasaliineq. Taamaalilluni aningaasaliineq naammassippat, inuiaqatigiinnut nutaaliaasumik umiarsualiorfiusumillu qulakkeerissavarput, ukiuni 25-30-ni atugassaqartitsilluni, Nils Duus Kinnerup nassuiaavoq.

Covid-19-mi ajornartorsiutit aallartipput pilersaarutillu allanngortariaqalerlutik

Aalisariutinik nutarterineq aallartippoq 2017-imi. 2019-ip naanerani nunarsuaq tamakkerlugu uninngatitsisoqarpoq, Covid-19-mi ajornartorsiutit aallartimmata, tamannalu ingerlatseqatigiiffimmut naatsorsuutigisamit ajornartorsiutaanerujussuarmik kinguneqarpoq:

- Tassani ukiunik marlunnik isertitaqarnissarput annaavarput, aamma 2020-mi naatsorsuutitsinni qularnaveeqqusiinerput pilersaarutigisatsinnit qaffasinnerulerpoq, aatsaat pandemiip kingorna inuiaqatigiillu atasinnaanerat aallarteqqammermat, qularnaveeqqusiinerput appartinniarlugu aallartissinnaalerpugut. Taamaakkaluartoq aalisariutinik nutaanik pisiaqarnissarput naammassiniartariaqarparput.

Nils Duus Kinnerup qularutiginngilaa, ingerlatseqatigiiffik qularnaveeqqusiinerup appartinnissaanut suliniuteqartuusoq, aamma aningaasaqarnikkut suleqatigiiffiit tamanna ilisimaarilluinnarpaat:

- Aningaasaqarnikkut suleqatigiiffiit tamanna ilisimaarilluinnarpaat, aamma suliniuteqarpugut qularnaveeqqusiinerput, siusinnerusukkut taaneqareersutut, ukiuni 3-4-ni appartinniarlugu.

Russit Ukrainemut sorsuunnerat aningaasalersuinermut kinguartitsinerulersitsivoq

Royal Greenland ukiumoortumik nalunaarusiaa qanittukkut saqqummiunneqartussaavoq. Tamanna pissaaq ataatsimeersuarnermi tallimanngornermi maajip 17-ani 2024-mi.

Aningaaserisoqarfimmi pisortaq maannakkorpiaq nalunaarusiami ilaasortaanngitsunik paasissutissiisinnaanngilaq, kisianni uppernarsarsinnaavaa Russit Ukrainemut sorsuunnerat aamma aningaasalersuinermut pilersaarutinut unammillernartuusoq:

- Rusland tassaavoq qalerallit qeqqussat tunisassiornermi nunarsuarmi anginerpaamik pisiortortartoq, aamma taamaattumik Ruslandimut tunisassiornerput unitsiinnarneqarnera 2023-mi naatsorsuutitsinnut sunniuteqarpoq, aammalu inuussutissarsiutinik atuinerup, Europami inuit atuinerat, sorsuunnerup kingunerisaanik allanngoriartornera, tamannalu aamma kinguneqartitsivoq, Royal Greenland A/S-imi pisortaq tullersorti Nils Duus Kinnerup oqarpoq Sermitsiap nittartagaanut.

Kinnerup erseqqissaavoq, Ruslandip Europamut akikitsunik saarullinnik annertuunik niueruteqarsimanera, tamannalu aamma isumaqarpoq, saarullinnut  nunarsuarmi akigititat pitsaanngitsumik sunniuteqarsimasut, taamatuttaaq saattussat taamatorluinnaq ingerlasimallutik.

- Taamaattumik Ruslandip Ukrainimut sorsunnera inuussutissanik imarmiunik niuffannermut sunniuteqarnerluppoq, tamatumalu malitsigisaanik akiitsunik annikillisaaniarnitsinnut aamma sunniuteqarnerlulluni.

Naggataatigullu Nils Duus Kinnerup erseqqissaavoq, Tuluit Nunaannik akitsuutitaqanngitsumik niueqateqarnerup amigaateqarnera aamma sunniuteqartoq. Niueqateqarnerup aallartinnissaanut, politikkikkut isumaqatigiissuteqanngikkaluartoq, niueqateqarnerup ingerlanneqarnissaa sulissutigineqarsimagaluarpoq, soorlu aamma Tuluit Nunaannut tunisat poortorneqarfissaannik pilersitsinikkut, taamaalilluni tunisassiat toqqaannartumik pisisartunut tunineqaratik poortoqqeqqaarlugit pisisussanut apuuttalerlutik. Tamannalu aamma unammillernartunik kinguneqarpoq, Kinnerup erseqqissaavoq.